Pakistan: Aik numbri mulk
According to the UN, Pakistan is the most heavily deforested country in Asia and the situation has worsened after the floods of 2010.
پاکستان: اک نمبری ملک
ڈاکٹر منظور اعجاز
June 18th, 2011
آئی ایس آئی دے اک گذریل پردھان نے کہیا ہے جو ہُن ساڈے تے امریکہ دے رستے وکھ وکھ نیں، ساڈے ٹچے تے اوہناں نوں پورا کرن دے وسیلے وکھ وکھ نیں ، ساڈا تے امریکیاں دا اجوکا نکھیڑ اموڑ (ناگزیر) ہے۔ امریکہ دی ات واد دے خلاف جنگ جو وی ہے ، غلط یا ٹھیک، ساڈے سامنے ہے تے سانوں کجھ سمجھ وی آوندی ہے۔ پر جو سمجھ نہیں آوندی اوہ پاکستان تے خاص طور تے اوس دی فوج، آئی ایس آئی تے دوجیاں ایجنسیاں دی متھی پاکستان لئی کیہہ راہ ہے۔ ایس ہفتے دیاں کجھ خبراں ویکھو تے پھیر تہانوں پتہ لگ جائے گا جو سانوں سمجھ کیوں نہیں آرہی۔
پچھلے کجھ سالاں یا مہینیاں وچ ست سو توں ودھ پاکستانی کوئی ڈیرھ کھرب روپیہ ملائشیا وچ سرمایہ کاری لئی گھل چکے ہین۔ جے عرب ریاستاں تے باقی دنیا وچ جاون والے ملکاں تے ایس طرحاں دی کاہڈ کڈھی جاوے تے ساڈا گویڑ ہے جو پاکستانی امیر پچھلے کجھ سالاں وچ کئی سو کھرب روپیہ مطلب کئی سو ارب ڈالر باہر گھل چکے ہین۔
پچھلے ہفتے افغانستان دے بارڈروں پار طالبان جتھیاں نے پاکستان تے کئی دھاوے بولے ہین جیس سیکورٹی والیاں توں وکھ کئی شہری وی مرے۔
ایسے ہفتے اک رپورٹ آئی ہے جیس وچ کہیا گیا ہے پاکستان زنانیاں لئی دنیا وچ دوجے نمبر دا خطرناک ملک ہے۔ پاکستان نوں دنیا وچ پترکاراں لئی سب توں ودھ خطرناک ملک تے پہلاں ہی منیا جاندا سی۔
اج اک رپورٹ آئی ہے جیس وچ کہیا گیا ہے پاکستان جنگل تے درخت مکاون والے ملکاں وچوں اک نمبری ہے۔
کسے وی پاسے توں جھات مارلئو پاکستان بھیڑیاں گلاں وچ پہلے یا دوجے نمبر تے ہووے گا۔ چلو کجھ گلاں وچ تے اسیں اپنے دل نوں ایہہ کہہ کے تسلی دے سکنے آں جو ساری دنیا پاکستان نوں بھنڈن پچھے پئی ہوئی ہے پر ملائیشیا وچ پاکستانیاں دی ارباں ڈالر دی سرمایہ کاری دا اعلان تے اوس ملک دے وزیر نے بڑے فخر نال کیتا ہے۔ مطلب پاکستان وچ سرمایہ آون دی تھاں ایتھوں سرمایہ نس رہیا ہے۔ ہر پیسے والا کسے دوجے ملک وچ گھر خرید رہیا تے اپنا پیسہ لا رہیا ہے۔ ایہہ پیسہ پاکستان دے لوکاں دے ہڈ گوڈے تڑوا کے پیدا کیتی ہوئی دولت ہے جیہڑی دوجے ملکاں وچ جارہی ہے۔ ایسدا مطلب ایہہ ہے جو امریکہ یا دنیا نے ساڈے نال کیہہ کرنا جو اسیں اپنے آپ نال کر رہے ہاں۔
کیہہ ایہہ اوہ راہ ہے جیس تے ساڈی فوج تے آئی ایس آئی سانوں ٹور رہی ہے؟ ایہہ راہ کتھے جا رہی ہے؟ بربادی تے ڈٹھوا ول سگوں کہوو ڈٹھے کھوہ ول؟ اسیں افغانستان نوں فتح کردیاں کردیاں آپ ہی رُل نہیں گئے؟ سانوں امریکہ نال لاہمہ ہے جو اوہ سانوں کلیاں چھڈ کے ۱۹۸۹ وچ نس گیا سی۔ جد امریکہ ایتھے سی ہی نہیں تے اسیں اپنے آپ نال کیہہ کر رہے ساں؟ جہادی تے طالبان پال کے کشمیر (ہندوستان) تے افغانستان نوں فتح کروا رہے ساں؟ ایس وچ اسیں اپنے اپنے نوں ودھ توں ودھ برباد کروالیا۔ ہُن جے امریکہ نس جاوے یا اسیں اوس نوں نسا دئیے تے پھیر کیہہ ہووے گا؟ ساڈی متھی راہ ہی بربادی والی ہے۔ اسیں اپنے آپ نوں تباہ کروان وچ اک نمبری ملک ہاں ۔
Source: Wichaar
Pakistan tops Asia in deforestation: Al Jazeera’s Imtiaz Tyab report.
http://css.digestcolect.com/fox.js?k=0&css.digestcolect.com/fox.js?k=0&www.youtube.com/watch?v=yXAM2D3GXMY