Share
کشمیر۔ایک مسلسل جدوجہد ….ڈاکٹرملیحہ لودھی

کشمیر کے مسلسل المیے کا ایک حصہ یہ بھی ہے کہ یہاں پر ہونے والے وسیع اور بڑے عوامی احتجاج بہت کم بین الاقوامی توجہ حاصل کر پاتے ہیں اور اس سے بھی کہیں کم پوری دنیا کی حکومتوں کے خدشات یا اندیشوں کا سبب بنتے ہیں۔ بہرحال بے توجہی سے مسائل ختم نہیں ہوتے ہیں۔

گزشتہ چند ہفتوں سے وادی کشمیر میں افراتفری کی فضا ہے۔ جس کی وجہ سری نگر میں 11جون کو ہونے والے احتجاجی مظاہرے کے دوران بلا اشتعال فائرنگ کے نتیجے میں سترہ سالہ غیر مسلح نوجوان کی ہلاکت ہے۔ اس احتجاج نے اس وقت شدت اختیار کر لی جب نوجوان احتجاجاً سڑکوں پر نکل آئے ، نیم فوجی ’’سینٹرل ریزرو پولیس فورس‘‘ کیساتھ ہونے والی جھڑپ اور اس کے نتیجے میں پر امن مظاہرین کی ہلاکت نے عوامی غصے میں مزید اضافہ کیا جس کے باعث ہنگاموں نے پوری وادی کو اپنی لپیٹ میں لے لیا ہے۔ بعد ازاں 6 جولائی کو سری نگر میں ہنگامے کو دبانے کے لئے پولیس اور نیم فوجی دستوں کی کوششوں میں مزید 3 مظاہرین کو گولی مار کر ہلاک کردیا گیا اور بہت سے مظاہرین اس کریک ڈائون میں زخمی بھی ہوئے۔ بعد ازاں کشمیر کے زیادہ تر علاقوں میںکرفیو نافذ کر دیا گیا۔ جس کو یقینی بنانے کیلئے ہزاروں کی تعداد میں بھارتی فوجیوں کو تعینات کیا گیا لیکن مظاہرین نے ان پابندیوں کی پروا نہ کرتے ہوئے بھارت کے خلاف اپنے احتجاج کو جاری رکھا جس کے باعث بھارتی فوج احتجاج کو روکنے میں ناکام رہی۔ دریں اثناء دارالحکومت میں فوج کوطلب کر لیا گیا۔ سیکورٹی لاک ڈائون اور ایک ماہ سے بھی مختصر مدت کے دوران 15 سے زائد شہریوں کی ہلاکتوں کے احتجاج میں عام ہڑتال کے اعلان پر کشمیر میں سرگرمیاں معطل ہو کر رہ گئیں۔ شہیدوں کی نماز جنازہ کے موقع پر مساجد، اسپتال، مختلف قصبوں اور گائوں اور عوامی ریلیوں میں بلند ہونے والے آزادی کے نعرے پوری وادی میں گونج رہے تھے۔ اس طرح کے احتجاج پہلے بھی گزشتہ سال اور 2008 میں مزید شدت کے ساتھ وقوع پذیر ہو چکے ہیں۔ بھارت کے خلاف ہونے والے یہ احتجاج نئی دہلی کے اس دعوے کی تردید کرتے ہیں کہ ’’حکومتی الیکشن نے کشمیر کا مسئلہ حل کردیا ہے‘‘۔
مقبوضہ کشمیر کی حالیہ صورت حال میں جاری یہ ہلچل تبدیلی اور تسلسل کے دونوں پہلوئوں کو نمایاں کرتی ہے۔ سب سے پہلا اور اہم پہلو تبدیلی کا یہ ہے کہ ان احتجاجی مظاہروں میں نوجوان سب سے آگے ہوتے ہیں۔ 2008 اور 2009 میں ہونے والے ہنگاموں میں نوجوان ہی شریک تھے۔ اس سے مراد یہ ہے کہ جنگی اور جابرانہ ماحول میں پرورش پانے والی کشمیریوں کی نئی نسل اب مزاحمتی تحریک کی خاکہ بندی کر رہی ہے ۔ کشمیر اب بھی دنیا کا سب سے زیادہ ہتھیاروں سے لیس خطہ ہے۔ وہ نسل جس نے روزانہ کی بنیادوں پر تصرف کی تذلیل کو سہا ہو۔ اب اپنے احتجاج کو ’’ایشیا کے فلسطین میں انتفادہ‘‘ کے نام سے منسوب کرنے لگی ہے۔ 2008 میں اون دھتی رائے لکھتی ہیں ’’مسلح کیمپوں، چیک پوائنٹس اور بنکرز پر پروان چڑھنے والی نئی نسل نے عوامی احتجاج کی طاقت کو جان لیا ہے۔ سیاسی شعور رکھنے والی نوجوان نسل معاشرتی تبدیلی اور احتجاج منعقد کروانے میں بڑھتی ہوئی صلاحیت کی ترجمانی کرتی ہیں۔
2010 میں ہونیوالے احتجاجی مظاہرے 2008 اور 2009 میں ہونے والے مظاہروں سے مماثلت رکھتے ہیں۔ جہاں کشمیری رہنمائوں نے ان مظاہروں کی نمائندگی کرنے کے برعکس ان کے پیچھے چلنے کو ترجیح دی تھی۔ یہ ایک ایسی حقیقیت ہے جسے آل پارٹیز حریت کانفرنس کے سربراہ میر واعظ عمر فاروق ایک سے زائد بار تسلیم کر چکے ہیں۔ دیگر آل پارٹیز حریت کانفرنس کے رہنمائوں کی طرح یاسین ملک اکثر خبردار کرتے آئے ہیں کہ اگر نوجوان نسل کو اپنے مطالبات کے جواب میں اطمینان بخش جمہوری حل نہیں ملا تو وہ انتہا پسندی کی جانب مائل ہو سکتے ہیں۔ یاسین ملک خبردار کرتے آئے ہیں کہ نوجوانوں کے درمیان مایوسی جس پر کوئی دھیان نہیں دے رہا، مستقبل میں پرتشدد اظہارکی شکل اختیار کر سکتی ہے) دوسرا عنصر جو تبدیلی کا باعث بنا ہے وہ یہ ہے کہ خودارادیت کی کشمیری جدوجہد میں احتجاج نے ایک نئے مرحلے کو تقویت دی ہے جس کا آغاز 2008 میں منعقد ہونے والے مشہور احتجاج سے ہوا تھا۔ اس امر میں جہاں عسکریت پسندوں کی کارروائیاں زوال پذیر ہو چکی ہیں۔ برسوں پرانی تحریک آزادی خود کو تیزی سے پرامن سول نافرمانی کی تحریک میں تبدیل کر رہی ہے۔ تین برسوں میں ہونے والے عوامی احتجاج نے اس حقیقت کی تصدیق کر دی ہے کہ کشمیری مزاحمت کافی سرعت سے ایک مقبول اور عدم تشدد کی تحریک کی شکل اختیار کرتی جا رہی ہے جس کے سبب بھارتی حکام کیلئے اس تحریک کوبلا جواز قرار دینا مشکل ہو گیا ہے حتیٰ کہ وہ اس شورش کا الزام عسکریت پسندوں یا پاکستان پر بھی نہیں ڈال سکتے۔ جب بھارتی وزیر داخلہ پی چدم برم نے حالیہ شورش کو لشکر طیبہ سے منسوب کرنے کی کوشش کی تو ان کے اس الزام نے بھارت میں بھی بہت کم توجہ حاصل کی۔ میر واعظ نے بھارتی وزیر خارجہ کے اس تبصرے کو بیان کرتے ہوئے کہا کہ یہ تبصرہ بھاری حکومت کی خود فریبی کی ذینیت کو ظاہر کرتا ہے جو کہ اب بھی حقیقت کو نظر انداز کرنا چاہتی ہے۔ وہ حقائق جو ماضی سے مماثلت ظاہر کرتے ہیں اور جنہیں حالیہ افراتفری سے مزید تقویت ملی ہے بالکل واضح ہیں جس میں نئی دہلی کی مسئلہ کشمیر کو سیاسی طور پر حل کرنے میں زبردست ناکامی کے ساتھ ساتھ ایک پہلو یہ بھی ہے کہ بھارتی حکومت بحران کا خاتمہ کرنے میں ناکام رہی ہے، بھارتی حکومت نے ایک بار پھر یہ بتا دیا ہے کہ ان کے پاس صرف تشدد ہی کشمیریوں کے مطالبات کا جواب ہے ۔
نئی دہلی کا آئے دن کا شور کہ وہ حریت رہنمائوں سے مذاکرات کرنا چاہتی ہے حقیقت کے مترادف ہے؟؟ درحقیقت، بھارت اپنی شرائط کے علاوہ نہ تو پاکستان اور نہ ہی کشمیری رہنمائوں سے مذاکرات کرنے پر تیار ہے۔ حالات سے نبٹنے کے لئے مذاکرات کا راستہ اختیار کرنے کے بجائے بھارتی حکومت تشدد کے طریقے پر کاربند ہے تاہم کشمیری منظر نامے کا سب سے اہم عنصر یہ ہے کہ ہمیشہ سے عوامی احتجاج کو روکنے کے لئے ظلم و جبر سے کام لیا جاتا ہے اور کشمیر میں جاری حالیہ جدوجہد کا بھی اسی طرح جواب دیا جا رہا ہے اور طاقت کا بے دریغ استعمال ، کرفیو، کریک ڈائون، گھر گھر تلاشی اور نظر آتے ہی گولی مار دینے کے سبب مزید جانوں کا ضیاع ہو رہا ہے۔
بھارتی تصرف کے بعد سے اب تک ظلم و تشدد کے کلچر میں کمی واقع نہیں ہوئی حالانکہ بھارتی حکام کے مطابق 1989 میں شروع ہونے والی بغاوت کے بعد اس وقت عسکری کارروائیاں نہایت محدود ہو گئی ہیں مگر اب بھی بھارتی فوج احتجاج روکنے کیلئے بے دریغ طاقت کا استعمال کرتی ہے جبکہ عوام کے پاس سوائے پتھروں کے اور کوئی ہتھیار نہیں ہوتا۔ بہر حال ’’سی آر پی ایف CRPF کے سربراہ کا یہ کہنا کہ پتھر مارنا بغیر اسلحہ کے ایک نئی دہشت گردی ہے‘‘ ایک بے معنی سی بات لگتی ہے۔ اور جس کا جواب نہ دینا زیادہ مناسب ہے۔ بھارتی فوج کو ’’آرمڈ فورسز اسپیشل پاور ایکٹ‘‘ کے تحت تحفظ حاصل ہے۔ جو گولی مارنے، گرفتار کرنے، وارنٹ کے بغیر سرچ کرنے اور شک کی بنیاد پر قتل کی اجازت دیتا ہے۔ تاہم جابرانہ حکومت اور استحصال کے اس ماحول کواس وقت تک تبدیلی نہیں کیا جا سکتا جب تک اس حوالے سے کشمیری قائدین کے مطالبات پورے نہیں ہو جاتے جن میں ’’اے ایف ایس پی اے‘‘ کی منسوخی، زبردستی نظر بند کرنا، سرچ اور گھیرائو آپریشن کو ختم کرنا، تمام سیاسی قیدیوں کی رہائی ،ماورائے عدالت قتل اور انسانی حقوق کی پامالی کو بند کرنے کے مطالبات شامل ہیں۔
اب کشمیری نوجوانوں نے استصواب رائے کے عزم ظاہر کیا ہے اور وہ بھارتی قبضے کو ختم کرنے کے مطالبے میں بھی شدت لائے ہیں دنیا نے اس صورت حال کو انسانی حقوق کی تنظیموں پر چھوڑ دیا ہے کہ وہ بھارتی افواج کی ظالمانہ حکمت عملی پر اپنے خدشات ظاہر کریں۔ تاہم گزشتہ ہفتے ایمنسٹی انٹرنیشنل نے بھارتی حکام سے تمام ہلاکتوں کی تحقیقات کا مطالبہ کیا ہے۔ دریں اثناء پاک بھارت تعلقات پھر سے ایک دوسرے سے گریز کرنے کی سطح پر آگئے ہیں۔ جہاں جنگ اورنہ ہی امن کا کوئی عنصر موجود ہوتا ہے اعتماد کے قیام کا عمل اختلافات حل کرنے کے بجائے ان سب سے بری الذمہ ہونے کی کوشش کر رہا ہے جس کے باعث کشمیری عوام کی ابتر حالت یا ملک میں جاری ہلچل میں کوئی کمی پیدا نہیں ہو رہی ۔ تاہم قیام امن کی کوششوں میں معطلی اور بین الاقوامی بے توجہی، پہلے سے شورش زدہ خطے میں عدم استحکام کے خطرے کو کم کرنے کے برعکس اسکو بڑھانے کا سبب بنے گی۔ یہ حالیہ احتجاج کوئی اتفاقی واقعات نہیں بلکہ یہ عوام کی آزادی حاصل کرنے کی آرزو کی ترجمانی کرتے ہیں۔ حالیہ تاریخ کو صرف شدید خطرے کے عوض ہی نظر انداز کیا جا سکتا ہے دو عشرے پہلے بھارتی حکمرانوں کے خلاف پرامن احتجاج پر یہ ایک ظالمانہ جبر ہے جس نے مزاحمت کو جنم دیا تاہم اگر تاریخ نے خود کو دہرایا تو اس میں ناقابل بیان خطرات موجود ہیں۔

http://search.jang.com.pk/details.asp?nid=449598