Share
جسٹس افتخار اور ایک نئی یلغار (1)…نقش خیال…عرفان صدیقی

مصحفی کے اس طرحدار شعر کی خوبصورتی مجھے اکسا رہی ہے ورنہ میں جانتا ہوں کہ کدورتوں اور نفرتوں سے بہری اس بے ذوق جنگ کا اس شعر سے کوئی ناتا نہیں۔ چلی بھی جا جرس غنچہ کی صدا پہ نسیم کہیں تو قافلہ نوبہار ٹھہرے گا باد نسیم کا غنچوں کے چٹکنے کی دلربا آواز کے تعاقب میں چلتے چلے جانا، چلتے چلے جانا کہ کہیں تو رنگ و خوشبو سے لدی اس بہار تازہ کا قافلہ رکے گا اور لمبے ہجر کی ماری لطیف ہوا لذت وصل سے ہمکنار ہوگی، کیا اچھوتا خیال ہے اور کس عمدگی سے ادا ہوا ہے۔ ایک تازہ یلغار کی زد میں آئی عدلیہ، بعض دلوں کی چمنیوں سے اٹھتا بغض و کدورت کا دھواں اور بعض خزاں رسیدہ چہروں پر یکایک کھل اٹھنے والی بشاشت سے اندازہ لگایا جاسکتا ہے کہ سب کچھ وہی نہیں جو دکھائی دے رہا ہے، کہانی کے پس پردہ بھی ایک کہانی موجود ہے۔ اس کہانی کے مشاق اور ہنر مند کردار بھیس بدلنے کی زبردست صلاحیت رکھتے ہیں لیکن بدلتے موسموں کے تیور ایسے ہیں کہ اپنے چہرے پر کئی چہرے چڑھا لینے کی قدرت رکھنے والے فنکار بھی اپنی شناخت کو چھپا نہ پائیں گے۔ بہر رنگے کہ خواہی جامہ می پوش من انداز قدت رامی شناسم تو چاہے جس بھی رنگ کی پوشاک پہن لے اور جو بھی بھیس بنا لے، میں تجھے تیرے قد و قامت کے انداز سے پہچان جاتا ہوں۔ سو شاید چہرے بے نقاب ہونے کی رت آگئی ہے۔ جرس غنچہ کی صدا پہ سفر کرتی باد نسیم کو قافلہ نو بہار کی کوئی منزل ملے نہ ملے، اسلام آباد کے سٹیج کا یہ تازہ ناٹک بہرحال لکھے گئے سکرپٹ تک محدود نہیں رہے گا۔ بظاہر کہانی اس قدر ہے کہ بحریہ ٹاؤن کے مالک، ملک ریاض حسین نے اپنے درجنوں مقدمات سے نجات پانے یا اپنے من پسند فیصلے حاصل کرنے کے لئے پاکستان کے چیف جسٹس عزت مآب افتخار محمد چودھری پر بھی وہی نسخہ آزمانے کی کوشش کی جو وہ راولپنڈی اور گردو نواح کے پٹواریوں، گرداوروں اور تحصیل داروں پر آزماتے رہے ہیں۔ فائل کو پہئے لگانے، کی حکمت عملی سے ملک صاحب نے کبھی انکار نہیں کیا۔ وہ نجی محفلوں میں ہی نہیں، ٹی وی پروگراموں میں بھی عملیت پسندی کے اس فلسفے کا کھلا اظہار کرتے رہے ہیں۔ ان کی اس بات میں خاصا وزن بھی ہے۔ کرپشن سے لت پت اس ملک میں جہاں پٹواریوں سے سیکریٹریوں اور وزراء یا شاید ان سے بھی ذرا اوپر کی سطح تک، چھوٹے بڑے دہانوں والی شارک مچھلیاں اپنے بھیانک جبڑے کھولے جھپٹ رہی ہوں، بحریہ ٹاؤن جیسے منصوبے کو صاف شفاف طریقے سے آگے بڑھانا آسمان میں تھگلی لگانے کے مترادف ہے۔ یہاں تو فٹ پاتھ پر ریڑھی لگانے اور گلی کی نکڑ پر کھوکھا چلانے والے کو بھی کوچہ و بازار کے ارباب اختیار کی مٹھی گرم کرنا پڑتی ہے۔ سو ملک صاحب نے جو کچھ پایا، بنایا اور کمایا، سب زمینی حقائق کے گہرے شعور اور ان کی عملیت پسندی کا ثمر ہے۔ درجنوں مقدمات سے زچ، بحریہ ٹاؤن نے برسوں پہ محیط اپنی آزمودہ اور کامیاب حکمت کار کے تحت جسٹس افتخارمحمد چوہدری کے قلعے میں نقب لگانے کے لئے ان کے صاحبزادے ارسلان افتخار کوشیشے میں اتارا۔ بعد کی کہانی کے خاصے اجزاء منظر عام پر آچکے ہیں۔ خلاصئہ کلام یہ ہے کہ مبینہ طور پر ارسلان افتخار پر کم و بیش بتیس کروڑ روپے کی سرمایہ کاری کی گئی۔ کوئی فائدہ حاصل نہ ہوا تو پیمانہ چھلک گیا۔ جس پر ملک صاحب نے اس سرمایہ کاری کے شواہد بعض صحافیوں اور اعتزاز احسن کو دکھائے۔ سنڈے ٹائمز کی کرسٹینا لیمب کو بھی یہ سٹوری دی گئی۔ پہلی سوچ یہ تھی کہ یہ دھماکہ عین اس دن ہو جس دن جسٹس افتخار محمد چوہدری ایک بڑا عالمی اعزاز وصول کرنے لندن میں موجود ہوں لیکن کسی وجہ سے یہ منصوبہ ترک کردیا گیا۔ چیف جسٹس نے میڈیا کی سرگوشیاں سنتے ہی معاملے کا سویو موٹونوٹس لیا اور پھر ضابطہ اخلاق کی پاسداری کرتے ہوئے خود بینچ سے الگ ہوگئے۔ امکان ہے کہ اب نسبتاً بڑا بینچ اس مقدمے کی سماعت کرے گا اور اہل پاکستان کو توقع ہے کہ عدلیہ اپنی عزت و حرمت کا پرچم سربلند رکھتے ہوئے قانون و انصاف کے تقاضوں پہ کوئی آنچ نہیں آنے دے گی۔ لیکن سوالات کا ایک جنگل ہے کہ پھیلتا چلا جا رہا ہے۔ کہانی الجھی ہوئی ہے اور بقول افتخار عارف کہانی آپ الجھی ہے کہ الجھائی گئی ہے یہ عقدہ تب کھلے گا جب تماشا ختم ہوگا تماشا ختم ہونے میں ابھی کچھ دیر لگے گی۔ لوگ کہتے ہیں، کیا ارسلان کو ایک منصوبے کے تحت جال میں پھانسا گیا؟ اس پہ نوازشات کی بارش کی گئی۔ ہر ایک چیز کا ریکارڈ رکھا گیا۔ یہاں تک کہ وڈیو فلمز بنائی گئیں۔ اتنی محنت مشقت اور سرمایہ کاری اس لئے نہیں ہوسکتی کہ فلم ریلیز کئے بغیر کسی ڈبے میں بند کردی جائے۔ جڑا ہوا سوال یہ پوچھا جاتا ہے کہ کیا ارسلان افتخار اتنا ہی سادہ و معصوم تھا کہ نوازشات کی اس برسات میں جل تھل ہوتا رہا اور اسے کچھ اندازہ نہ ہو پایا کہ بحریہ ٹاؤن اس پر اس قدر مہربان کیوں ہو گیا ہے؟ آج کل تو جب کوئی آدمی دونوں ہاتھوں سے مسکراتے ہوئے ذرا جھک کر مصافحہ کرے تو ماتھا ٹھنکتا ہے کہ ضرور اسے کوئی کام ہے۔ ارسلان افتخار کیوں نہ بھانپ سکا کہ نوازش ہائے بے جا کا سبب کیا ہے؟ پھر ایک نئے سوال کی کونپل پھوٹتی ہے کہ جب ارسلان کی نااہلی عیاں ہوگئی تھی اور وہ بحریہ ٹاؤن کو کسی طرح کا کوئی ریلیف دینے میں کامیاب نہیں ہوسکا تھا بلکہ چار درجن کے لگ بھگ تمام مقدمات کے فیصلے بحریہ ٹاؤن کے خلاف آئے تو ارسلان پر سرمایہ کاری کا سلسلہ کیوں جاری رہا؟ پاؤ بھر دودھ نہ دینے والی بانجھ بھینس کی کھرلی میں کئی برس تک لذیز چارہ کیوں ڈالا جاتا رہا؟ ملک صاحب خود بھی کہتے ہیں اور پاکستانی قوم بھی یہ سمجھتی ہے کہ عزت مآب چیف جسٹس کا اس کھیل سے دور کا واسطہ بھی نہ تھا لیکن پھر یہ چبھتا ہوا سوال کہ ایک زیرک اور جہاں دیدہ شخص اپنے بیٹے کے طور اطوار سے اس قدر بے خبر اور لا تعلق کیسے رہا؟ ہماری تہذیب و معاشرت میں تو والدین بچوں کی آنکھوں میں جھانک کر، ان کے دلوں کی دھڑکنیں تک پڑھ لیتے ہیں۔ پھر یہ سوال کہ اگر ارسلان افتخار کے لئے ایک جال بنا گیا تو کیا ملک ریاض حسین یہ جال بننے والے گروہ میں شامل ہیں؟ اگر شامل ہیں تو ان کا مفاد کیا ہے؟ پاکستان کا سب سے موثر اور سب سے مقتدر کاروباری ہوتے ہوئے، ایک عظیم الشان بزنس رکھنے والا شخص کیوں چاہے گا کہ وہ اپنی ذات اور اپنے کاروبار کو ایک بڑے خطرے سے دوچار کرتے ہوئے اس طرح کی مہم جوئی کا آلہ کار بنے؟ کاروباری لوگ بنیادی طور پر حکمت کے ساتھ راستہ تراشنے والے مصلحت کیش ہوتے ہیں۔ بارودی سرنگیں بچھانا اور دھماکے کرنا ان کی فطرت میں نہیں ہوتا۔ ملک ریاض حسین کی تو پوری زندگی اس فلسفے سے عبارت رہی ہے؟ تو کیا ارسلان کی طرح ملک صاحب بھی کسی جال میں آگئے؟ اگر ایسا نہیں تو پھر یہ سوال کہ ملک ریاض حسین جیسے ہنر کار اور بحریہ ٹاؤن جیسا مثالی جہان نو آباد کرنے والے بہترین منصوبہ ساز نے جس کے لئے 32 کروڑ روپے کا کڑوا گھونٹ بھر کر سب کچھ بھول جانا کوئی مشکل کام نہ تھا۔ اپنی ذات اپنے خاندان اور اپنے اربوں کھربوں کے کاروبار کو داؤ پر کیوں لگادیا؟ اور پھر سب سے بڑا سوال کہ کیا پس پردہ بیٹھے کچھ زخم خوردگان کے لئے افتخار محمدچوہدری اسی طرح ناقابل برداشت ہوگیا ہے جس طرح وہ روسیاہ ڈکٹیٹر کے لئے ہوگیا تھا؟ (جاری ہے)

http://jang.net/urdu/details.asp?nid=627017

مال اور اولاد کا فتنہ…جرگہ…سلیم صافی

”رات لاہور میں گزارنے کے بعد صبح ساڑھے بارہ بجے کی پی آئی اے کی فلائٹ سے میں نے واپس اسلام آباد آنے کا پروگرام بنایا تھا اور شیڈول کے مطابق یہاں دوبجے کو ایک میٹنگ میں شرکت کا وعدہ کیا تھا۔ بورڈنگ پاس لینے کے لئے پی آئی اے کے کاونٹر پر گیا تو وہاں عدلیہ سے تعلق رکھنے والے ایک سرکاری ملازم کو موجود پایا۔ وہ ایک اعلیٰ عدالتی شخصیت کے اہل خانہ جنہوں نے چانس کے ٹکٹ لئے ہوئے تھے ، کے لئے بورڈنگ پاس لینے کی غرض سے وہاں موجود تھے۔ ہم سب جانتے ہیں کہ کنفرم ٹکٹوں کے بورڈنگ پاس ایشو ہونے کے بعد چانس کے مسافروں کو بورڈنگ پاس ایشو کئے جاتے ہیں اور یہ عمل فلائٹ کی روانگی سے چند لمحہ قبل مکمل کیا جاتا ہے۔ عجیب بات یہ تھی کہ ان وی آئی پی مسافروں کو انتظار کی زحمت سے بچانے کی غرض سے ائرپورٹ لانے کی بجائے انہیں گھر پر بیٹھے رہنے کا کہا گیا تھا اور انہیں بتایا گیا تھا کہ اگر سیٹ مل گئی تو پھر وہ ائرپورٹ روانہ ہوجائیں گے۔ چنانچہ جب بورڈنگ پاس ایشو ہوئے ، تب ان کو فون کرکے ائرپورٹ آنے کا کہا گیا ۔ ائرپورٹ کے باہر پی آئی اے کے خصوصی کوسٹر کو ان کے لئے تیارکیا گیااور سول ایوی ایشن کے عملے کے کئی افراد ان کے استقبال کے لئے کھڑے ہوگئے ۔ دیگر مسافروں کی طرح میں بھی جاکر جہاز میں بیٹھ گیا لیکن ساڑھے بارہ بجے جہاز روانہ نہ ہوسکا۔ جہاز سٹارٹ ہوگیا تھا۔ باقی سب مسافر تیار تھے لیکن پتہ چلاکہ عدالتی شخصیت کے اہل خانہ کے ائرپورٹ پہنچنے کا انتظار ہورہا ہے۔ آدھے گھنٹے کی تاخیر کے بعد جہاز کے کپتان نے معذرت کیلئے اناوٴنسمنٹ کی لیکن تاخیر کی وجہ بیان نہ کرسکے۔ صرف اتنا کہہ دیا کہ بعض مسافروں کا انتظار ہورہا ہے ۔ پرواز کے مقررہ وقت کے چالیس منٹ بعدیعنی ایک بج کر دس منٹ پر جہاز کے عملے کا ایک فرد میرے پاس آیا اور مجھے مخاطب کرکے کہنے لگا کہ یہ کیا ہورہا ہے ؟ ہم تو کہہ رہے تھے کہ یہ لوگ ہمیں انصاف دلائیں گے لیکن آپ دیکھ رہے ہیں کہ ان کے اہل خانہ کی وجہ سے سو کے قریب مسافروں کو بھی تکلیف ہورہی ہے، ہم بھی شرمندہ ہورہے ہیں اور جہاز کا تیل بھی خرچ ہورہا ہے ۔ان کا کہنا تھا کہ خود وی آئی پیز تو چلو وقت بچانا چاہتے ہیں لیکن ان کے اہل خانہ اور دوستوں کے لئے قوم کے ساتھ یہ زیادتی کیوں ہورہی ہے ؟ پھر اسی وی آئی پی کلچر کے مزید قصوں کو بیان کرتے ہوئے انہوں نے بتایا کہ پچھلے دنوں لندن کی فلائٹ میں ان کی ڈیوٹی تھی ۔ اس جہاز میں ایک اعلیٰ حکومتی شخصیت کی بیوی نے پاکستان آنا تھا۔ وہ شاپنگ کی وجہ سے لیٹ ہوگئی تھی اور ان کیلئے دو گھنٹے تک سینکڑوں مسافر جہاز میں انتظار کرتے رہے ۔ ہمارا تو خیال تھا کہ ہماری عدلیہ ان حکومتی شخصیات کو اس طرح کی حرکتوں سے باز رکھے گی لیکن اب جب کہ اس کے بعض افراد خود ایسا کررہے ہیں تو پھر ہم کس کے پاس جائیں ؟ وہ یہاں تک کہہ گئے کہ اس ملک کا آخر کیا بنے گا اور ان حالات میں یہ ملک کیسے چل سکے گا؟۔ میں نے ان کو تسلی دی کہ ملک کو انشاء اللہ کچھ نہیں ہوگا۔ چند لوگوں کی غلطیوں کا یہ مطلب نہیں کہ پوری قوم ایسی ہے ۔ اس قوم کی زندگی کا یہ ثبوت کیا کم ہے کہ اس عدلیہ کی بحالی کیلئے اس کے لاکھوں لوگوں نے مالی اور جانی قربانیاں دیں اور اب وہ عدلیہ بڑی حد تک حکمرانوں کو نکیل ڈال رہی ہے ۔ اس نے ابھی تک بلاشبہ وی آئی پی کلچر کا ازخود نوٹس نہیں لیا لیکن ملک کے بعض طاقتور لوگوں اور اداروں کو طلب کرکے زندگی کاثبوت ضرور دیا ہے ۔ ان کو تسلی دی کہ مجھے حسن ظن ہے کہ آج جو کچھ ہوا ، یہ اس عدالتی شخصیت کے نوٹس میں نہیں ہوگا۔ شاید نیچے کے لوگ نمبر بنانے کیلئے یہ پھرتیاں دکھارہے ہیں۔ میں نے ان کے ساتھ وعدہ کیا کہ چونکہ اس شخصیت سے میرا براہ راست رابطہ نہیں ، اس لئے میں یہ واقعہ اپنے کالم میں نقل کروں گا۔ اگر تو انہوں نے اس کانوٹس لے لیا تو آپ کو اپنی مایوسی ختم کرنی ہوگی اورمیں بھی اپنے حسن ظن پر قائم رہوں گا اگر نہ لیا تو پھر میں بھی آپ کی طرح اپنا حسن ظن ختم کرلوں گا۔ لیکن میں پھر بھی ملک کے مستقبل سے متعلق سوال اٹھاؤں گا اور نہ پوری قوم سے مایوس ہوں گا۔ میں بس صرف اور صرف عدلیہ سے وابستہ توقعات کو دفن کرکے نئے منصفوں اور نئی صبح کا انتظار کرنے لگ گیا۔“ زیرنظر اقتباس گیارہ جنوری 2011ء کو جنگ میں شائع ہونے والے ”جرگہ“ سے لیا گیا ہے ۔ تب بھی مجھے یہ حسن ظن تھا کہ ضروری نہیں کہ اپنے اہل خانہ کی اس طرح کی سرگرمیوں میں خود اعلیٰ عدالتی شخصیت کی ایما شامل ہو اور آج بھی میں اس حسن ظن کا سہارا لے رہا ہوں کہ جو کچھ ہوتا رہا اس میں بیٹے کے ساتھ باپ ہر گز شریک نہیں ۔ وہ شریک ہوتے تو کسی نہ کسی مقدمے میں ملک ریاض صاحب کو رعایت ملتی لیکن خود ملک صاحب فرمارہے ہیں کہ رعایت ملنے کی بجائے ان کے ساتھ زیادتی ہوتی رہی۔ لیکن اس امر سے بھی انکار نہیں کیا جاسکتا کہ پچھلے سالوں کے دوران دوسروں کے بچوں کے ساتھ ساتھ اپنے بچوں کے محاسبے کا عمل بھی جاری رہتا تو آج ہمیں یہ دن نہ دیکھنا پڑتا۔ میں پچھلے دو سالوں کے دوران گزشتہ روز پہلی مرتبہ سپریم کورٹ گیا اور سچی بات یہ ہے کہ عدالت میں چیف جسٹس صاحب کو اپنے بیٹے کے کیس کی سماعت کرتے ہوئے دیکھا تو دل خون کے آنسو رو رہا تھا۔ جس حوصلے اور استقامت کے ساتھ وہ اپنے بیٹے کے کیس کی سماعت کررہے تھے، اس نے میرے دل میں ان کی عزت مزید بڑھا دی لیکن اس روز مجھے وہ معزولی کے دنوں سے بھی بڑھ کر ہمدردی کے مستحق نظر آئے ۔7 جون کو سپریم کورٹ کے کورٹ روم نمبر ون میں چیف جسٹس صاحب کے بیٹے کے مقدمے کی ابتدائی سماعت ختم ہوئی تو وزیراعظم صاحب کے صاحبزادے کے کیس کی سماعت شروع ہوئی۔ اس کیس کی سماعت کے دوران بار بار یہ قرآنی آیت میرے ذہن میں گونج رہی تھی کہ ”بیشک تمہارے مال اور تمہاری اولاد تمہارے لئے آزمائش ہے“۔ غور سے دیکھا جائے تو یہی دو چیزیں ان دنوں پاکستان میں انتشار اور ہیجان کا باعث بنی ہیں۔ ملک ریاض صاحب مال اور اولاد کی وجہ سے برہم ہیں ۔ چیف جسٹس صاحب اولاد کی وجہ سے آزمائش میں ہیں ۔ مونس الٰہی ہو کہ حمزہ شہباز ، موسیٰ گیلانی ہو کہ عیسیٰ گیلانی، سب والدین کیلئے نیک نامی کی بجائے پریشانی کا موجب بن رہے ہیں۔ سپریم کورٹ میں جب ڈاکٹر ارسلان کے بعد وزیراعظم کے بیٹے کے کیس کی سماعت شروع ہوئی تو میں نے ساتھ بیٹھے ایک سینئر وکیل سے عرض کیا کہ کیوں نہ اب بڑوں کی اولاد کیلئے ”عدالت اولاد“ کے نام سے ایک الگ عدالت بنائی جائے تاہم انہوں نے تجویز دی کہ الگ عدالت کی بجائے بہتر ہوگا کہ اعلیٰ عدالتوں کا ایک دن بیٹوں کے کیسوں کی سماعت کے لئے مختص کی جائے۔ اس گفتگو کے نتیجے میں ہم اس نتیجے تک پہنچے کہ سب کیلئے اولاد اس لئے رسوائی کا موجب بن رہی ہے کہ ہر کوئی دوسرے کے بچے کا احتساب کرنا چاہتا ہے لیکن اپنے بچے کا احتساب نہیں چاہتا ۔ اگر وزیراعظم اپنا اور اپنے بیٹے کا ، شہباز شریف اپنا اور اپنے بیٹے کا ، ملک ریاض اپنا اور اپنے بیٹے کا اور جج صاحبان اپنا اور اپنے بیٹوں کا احتساب کرتے تو یہ ملک جنت بن گیا ہوتا اور آج جو سب باری باری شرمندگی اٹھارہے ہیں، اس کی نوبت بھی نہ آتی ۔ اللہ کا شکر ہے کہ چیف جسٹس افتخار محمد چوہدری نے اس اچھی روایت کا آغاز کردیا لیکن اب دیکھنا یہ ہے کہ وہ احتساب کس قدر حقیقی احتساب ثابت ہوتا ہے اور یہ کہ دوسرے بھی ان کی تقلید کرتے ہیں یا نہیں ۔ مرضی ہر ایک کی اپنی ہے لیکن بہر حال بچاؤ کا واحد راستہ اب یہی ہے کہ دوسروں کے احتساب پر اصرار کی بجائے ہر کوئی اپنا اور اپنی اولاد کا احتساب کرے ورنہ وقت سب کا محاسبہ کرے گا اور وقت کا محاسبہ بڑا بے رحم ہوتا ہے۔

http://jang.net/urdu/archive/details.asp?nid=626907