پیامن بھائی پارٹی…سویرے سویرے…نذیر ناجی

میڈیا کا کمال ہے کہ لوگوں کو بغیر پانی کے سونامی اور بغیر انقلابیوں کے انقلاب آنے کا یقین دلا دے۔ یہ جلسوں کا موسم ہے اور گزشتہ چند روز کے دوران جتنے جلسے ہوئے ہیں‘ سبھی تھوڑے بہت فرق کے ساتھ بہت بڑے جلسے تھے۔ لاہور میں عمران خان کے بعد دفاع پاکستان کے نام سے مینار پاکستان پر ہی ایک جلسہ ہوا۔ جو حاضری میں کسی بھی اعتبار سے پہلے کے مقابلے میں کم نہیں تھا۔بنیادی طور پر یہ مذہبی جماعتوں کا جلسہ تھا لیکن اس میں دو بڑی جماعتوں نے حصہ نہیں لیا۔یعنی جماعت اسلامی اور جمعیت علمائے پاکستان۔ اگر یہ دونوں جماعتیں بھی جلسے میں شریک ہو جاتیں‘ تو یقینی طور پر یہ بے نظیرشہید کے جلسے کی یاد دلا سکتا تھا۔اس کے بعد چشتیاں میں نوازشریف کا جلسہ بھی بہت بڑا تھا اور چھوٹے شہر کے تناسب سے جلسے کی حاضری کو دیکھا جائے‘ تو بلاشبہ یہ بھی ایک بہت بڑا جلسہ تھا۔ انہی دنوں ایم کیو ایم نے ملتان میں ایک جلسہ کیا‘ جو پنجاب میں ایم کیو ایم کے جلسوں میں سب سے بڑا جلسہ تھا اور سیاسی اعتبار سے یہ خصوصی اہمیت کا حامل تھا۔ اس کے اثرات یقینی طور پر پنجاب کی سیاست پر بہت گہرے ہوں گے۔ مگر ان سارے جلسوں کو حاضرین کی تعداد کی مناسبت سے میڈیا پر وہ اہمیت نہیں دی گئی‘ جو تحریک انصاف کے جلسے کو نصیب ہوئی اور بعض چینلز پر تو ٹی وی پر لائیورپورٹنگ کرنے والوں نے ایسے جوش و خروش سے تقریریں کیں‘ جیسے وہ خود پرجوش سیاسی کارکن ہوں۔ ان کے انداز سے لگتا تھاکہ بس چلے تو یہ اعلان بھی کر دیں کہ قائد اعظم نے تحریک انصاف میں شمولیت کا اعلان کر دیا ہے۔ اس وقت فوجی قیادت ‘ سیاسی معاملات میں سختی سے لاتعلقی کی پالیسی پر گامزن ہے۔ ورنہ جنرل ضیا یا جنرل یحییٰ خان کا زمانہ ہوتا‘ تو مزار کی ڈیوٹی پر مامور گارڈز سے یہ بھی کہلوایا جا سکتا تھا کہ قائد اعظم نے جلسے کے شرکاء کو اپنی حمایت کا یقین دلا دیا ہے۔
ان دنوں ذوالفقار علی بھٹو کی مثالیں کثرت سے دی جا رہی ہیں۔ مثالیں دینے والوں کو شاید یاد نہیں کہ اس وقت کے میڈیا میں بھٹو کا نام تک شائع نہیں ہوا کرتا تھا۔ جماعت اسلامی کی کارنر میٹنگ بھی ہوتی تو اس کی بڑی بڑی تصویریں شائع ہوا کرتیں اور مقررین کی تقاریر کو تفصیل سے نقل کیا جاتا اور بھٹوصاحب لاکھوں کے جلسے سے بھی خطاب کرتے‘ تو ان کی خبر اندرونی صفحات پر سنگل کالم شائع ہوتی۔ جماعت اسلامی نے یوم شوکت اسلام کے نام سے ایک جلوس نکالا‘ تو اس کی خبریں آٹھ آٹھ کالم میں تصاویر کے ساتھ ہیڈلائنز کے طور پر شائع ہوئیں۔ چند ہی روز بعد پیپلزپارٹی اور جمعیت العلمائے اسلام نے مل کر کاروان جہاد کے نام سے ایک جلوس نکالا‘ جس کے شرکاء کی تعداد جماعت اسلامی کے جلوس سے کئی گنا زیادہ تھی۔ مگر اس وقت کے اخباروں میں اس کی ایک چھوٹی سی تصویر اور دو کالمی خبریں شائع ہوئیں اور بڑے اخباروں نے تو انہیں بھی اندرونی صفحات پر جگہ دی۔میڈیا نے اس زمانے میں جو فضا پیدا کر رکھی تھی‘ اسے دیکھ کر کوئی سوچ بھی نہیں سکتا تھا کہ پیپلزپارٹی مغربی پاکستان میں سب سے زیادہ ووٹ حاصل کرے گی۔ خود سٹیک ہولڈرز غلط فہمیوں میں مبتلا ہو گئے تھے۔ جماعت اسلامی کے حامی مبصرین جو ایک بار پھر سے پیش گوئیاں کرنے لگے ہیں‘ اس زمانے میں جماعت اسلامی کو عوامی لیگ سے بھی زیادہ انتخابی کامیابی دلایا کرتے تھے اور انتخابی نتائج کے بارے میں ان کے اندازوں کے مطابق پیپلز پارٹی کو صرف بیس اکیس نشستیں ملا کرتی تھیں اور عوامی لیگ کو اس سے دوگنا‘ باقی ساری نشستیں دائیں بازو کی جماعتوں کے حصے میں دکھائی جاتی تھیں۔ لیکن جب نتیجہ سامنے آیا‘ تو85فیصد سے زیادہ نشستیں انہی دو جماعتوں کو ملیں‘ جن کا جیتنے والوں میں شمار تک نہ ہوتا تھا۔ میڈیا کے دھوم دھڑکے اور اصل عوامی موڈ ہمیشہ یکساں نہیں ہوتے اور بعض اوقات تو میڈیا اتنی سینہ زوری دکھاتا ہے کہ حنیف عباسی سے دو مرتبہ ہارنے والے ایک سیاستدان کو ہرانے والے کے مقابلے میں 20گنا زیادہ کوریج دی جاتی ہے۔ آپ کسی بھی دن غور سے ٹی وی نشریات دیکھیں ‘ حنیف عباسی اگر ایک مرتبہ ٹی وی پر نظر آئیں گے‘ تو ان سے ہارنے والے سیاستدان مختلف چینلوں پر 20مرتبہ دکھائی دیں گے۔اسی طرح تقسیم سے پہلے کانگریس کے مقابلے میں مسلم لیگ کو بہت کمزور ظاہر کیا جاتا تھا۔ لیکن جب انتخابات ہوئے‘ تو مسلم لیگ مسلمانوں کی نشستوں پر فیصلہ کن اکثریت سے کامیاب ہو گئی۔ حالانکہ ایک دو کے سوا برصغیر کے تمام علمائے کرام کانگریس کی حمایت یا مسلم لیگ کی مخالفت کر رہے تھے۔ لیکن ایک بات بہرحال ماننا پڑتی ہے کہ میڈیا جس لیڈر یا جماعت کے بارے میں بھرپور مہم چلانے لگے‘ تو ایک عمومی تاثر ضرور اس کے حق میں پیدا ہو جاتا ہے اور یہ امیدیں ابھرنے لگتی ہیں کہ انتخابی کامیابی بھی اسی جماعت کے حصے میں آئے گی‘ جس کے حق میں میڈیا فیصلے جاری کر رہا ہے اور ان فیصلوں پر شک و شبہے کا اظہار کرنے والے کو ہمہ جہتی تنقید کا نشانہ بننا پڑتا ہے۔
ان دنوں عمران خان کی لہر کو خوب اٹھایا جا رہا ہے اور بڑے بڑے سیاستدان اس لہر کا حصہ بننے کے لئے ایک دوسرے پر سبقت لے جا رہے ہیں اور جاوید ہاشمی کی تحریک انصاف میں شمولیت کے بعد تو شمولیت کا اعلان کرنے والوں کی قطاریں لگیں گی۔ سردار آصف احمد علی اس کی پہلی مثال ہیں۔ میرے بے شمار دوست تحریک انصاف میں جا چکے ہیں اور ان میں اکثریت کی شہرت کافی اچھی ہے۔ خورشید محمود قصوری‘ جہانگیر ترین‘ اسحق خاکوانی‘ جاوید ہاشمی اور سردار آصف احمد علی تو بڑے لیڈر ہیں‘ مقامی سطح کے لیڈر بھی جوق در جوق عمران خان کی طرف آ رہے ہیں۔ سیالکوٹ سے میرے دوست امتیازالدین ڈارجو بلدیاتی سطح پر اپنا ٹھوس حلقہ انتخاب رکھتے ہیں‘ وہ بھی اپنے بیٹے کے ساتھ تحریک انصاف میں شامل ہو چکے ہیں۔ سیالکوٹ سے یاد آیا کہ ڈاکٹر فردوس عاشق اعوان بھی جاتے جاتے رہ گئیں۔ اس کی ایک وجہ یہ تھی کہ وزیراعظم گیلانی نے انہیں اپنی وزارت کے سارے اختیارات دے دیئے۔ وہ اختیارات بھی جو روایتی طور پر ہمیشہ سیکرٹری کے پاس رہے ہیں۔ واقفان حال ان اختیارات میں بھرے رس کو اچھی طرح جانتے ہیں۔ ڈاکٹر صاحبہ نے پیپلزپارٹی سے اپنے اکتائے ہوئے دل کو تھوڑی دیر کے لئے بہلاتے ہوئے ”قیام و طعام“ کے عرصے میں تھوڑا سا اضافہ کر دیا ہے۔ لیکن انتخابات سے پہلے وہ حتمی فیصلہ ضرور کریں گی۔ انتخابی سیاست کے ماہرین نے بغیر پانی کے سونامی کی لپیٹ میں آنے والے بڑے بڑے ناموں کی فہرست بنا کر جو تجزیئے کئے ہیں‘ ان کے مطابق نام ضرور بڑے ہیں مگر ان کی انتخابی طاقت اس طرح یقینی نہیں‘ جس طرح ن لیگ‘ پیپلزپارٹی اور ق لیگ کے انتخابی امیدواروں کی ہے۔ میں نام نہیں لکھ رہا لیکن تحریک انصاف میں شامل ہونے والے بڑے بڑے ناموں کی گنتی کر کے دیکھ لیں‘ جن کے بارے میں لغاری برادران کی طرح وثوق سے کہا جا سکے کہ وہ انتخابات میں کامیاب ہونے کی صلاحیت رکھتے ہیں۔ ابھی انتخابات میں بہت وقت پڑا ہے۔ کچھ نہیں کہا جا سکتاکہ تب تک تحریک انصاف کے زور میں اضافہ ہوتا ہے یا وقت کا فاصلہ طے کرتے کرتے سونامی کے زور میں کمی آتی ہے۔جلسوں کی حاضری دیکھ کر اندازے لگائے جائیں‘ تو پھر دینی جماعتوں‘ ایم کیو ایم‘ جماعت اسلامی اور نواز شریف کے جلسے بھی چھوٹے نہیں ہیں۔ بس وہ پیا یعنی میڈیا کے من کو نہیں بھائے۔کراچی کے جلسے میں واضح تھا کہ یہ ایم کیو ایم کی ”رضامندی“ سے ہو رہا ہے۔

http://search.jang.com.pk/details.asp?nid=584172