Irfan Siddiqi used to be a speech writer for Pakistani version of Mullah Omar, President Rafique Tarar.

فی سبیل اللہ فساد اور فی سبیل اللہ جہاد!…روزن دیوار سے … عطاء الحق قاسمی

میں برادرم ایاز امیر کا ممنون ہوں کہ انہوں نے پاکستان میں عدم برداشت اور رواداری کے فقدان کا جو سیلاب پاکستان کی بنیادوں سے ٹکرانے اور یوں اسے کھوکھلا کرنے کا باعث بن رہا ہے، کے موضوع پر لکھے اپنے کالم میں تقریباً وہ سب باتیں کہہ دی ہیں جن میں سے کچھ میرے دل میں بھی تھیں اور جن کی بنیاد پر میں کالم باندھنے کا ارادہ کر رہا تھا۔ ایاز امیر نے یہ باتیں اتنی خوش اسلوبی سے کی ہیں کہ اب میں انہیں دہرانے کے سوا کچھ نہیں کرسکتا اور انہیں دہرانے میں نہ صرف یہ کہ کوئی حرج نہیں بلکہ ہمیں اگر اسلام اور پاکستان سے محبت ہے اور ہم ان دونوں کو سربلند دیکھنا چاہتے ہیں تو ہمیں یہ باتیں بار بار دہرانا ہوں گی۔ اس وقت تک دہرانا ہوں گی جب تک متعلقہ طبقات اپنی پالیسیوں کا رخ صحیح سمت کی طرف نہیں موڑتے تاہم مجھے ان کی کچھ باتوں سے اختلاف بھی ہے جن کا تذکرہ میں کالم کے آخر میں کروں گا۔
میرے نزدیک ایاز امیر نے جو باتیں کی ہیں ان کا خلاصہ یہ ہے کہ آج پاکستان جن اتھاہ گہرائیوں میں گر رہا ہے وہ انگریزی بولنے والے طبقے کی مہارت کا شاہکار ہے اور یہ وہ لوگ ہیں جو اپنے تمام تر اعمال میں سیکولر ہیں مگر مرجائیں گے خود کو سیکولر نہیں کہلائیں گے… مولوی ہمارے امریکہ کے ساتھ معاہدوں سینٹو اور سیٹو، انڈیا کے ساتھ ہماری مہم جوئی، جہادی کلچر کو فروغ چڑھانے کے ذمہ دار نہیں ہیں، موخر الذکر المیہ فوج، جس کی قیادت جنرل ضیاء کے پاس تھی کا شاہکار ہے۔ اس میں کوئی شک نہیں کہ مذہبی عناصر اس میں بہت لگن سے شامل ہوگئے مگر بہرحال وہ اس کے موجد نہ تھے۔ … یہ تصور کہ انڈیا پاکستان کا جانی دشمن ہے اور اسے تباہ کرنے پر تلا ہوا ہے، کسی مدر سے نہیں بلکہ ہماری دفاعی حکمت عملی کا جزو لاینفک جی ایچ کیو کی پیداوار ہے… ہمارا شکستہ نظام تعلیم ہمارے انگریزی بولنے والے طبقے، جس نے کبھی بھی پورے ملک کے لئے یکساں تعلیمی پالیسی، کتب، نصاب اور ذریعہ تعلیم رائج کرنے کی زحمت نہیں کی، کا عطا کردہ ہے۔ فوج جس نے پاکستان پر راج کیا ہے اس کے علاوہ مرکزی سیاسی جماعتیں بھی اقتدار میں ر ہی ہیں پاکستان کی ناکامی دراصل ان سب کی ناکامی ہے۔ مذہبی جماعتیں تو ثانوی کردار ادا کرتے ہوئے اپنے لئے جتنابھی فائدہ اٹھا سکتی تھیں انہوں نے اٹھایا مگر ان کے پاس قوتِ فیصلہ کبھی بھی نہیں تھی۔ (کیونکہ وہ کبھی اقتدار میں نہیں رہیں) یہ پاکستان کے جنرلز، سیاستدان اور ان کے ساتھ تعاون پر آمادہ کوتاہ نظر بیورو کریٹس تھے جن کی اگائی ہوئی فصل آج پک چکی ہے۔
ایاز امیر کے مطابق اگر مذہب کا دنیاوی مقاصد کی خاطر غلط استعمال ہوا تو بھی قصور ارباب اختیار کا ہے، جنرل ضیاء کو رخصت ہوئے 22سال ہوچکے ہیں لیکن اگر آج بھی اس کی سوچ پھل پھول رہی ہے تو قصور کس کا ہے۔ آج کا پاکستان جناح کا پاکستان نہیں ہے ، اگر ہم حصول پاکستان کے اصلی مقاصد کی طرف نہ لوٹ سکے تویہ پاکستان کے سیکولر حکمرانوں اور فوجی جنرلز کی کج فہمی اور بے بصری ہے، ہم اس پر مذہبی طبقے کو مورد الزام کیوں ٹھہرائیں؟ میرے نزدیک ایاز امیرکے بیان کردہ نکات میں سب سے اہم نکتہ یہ ہے کہ یہ مولوی نہیں جو حکمران طبقے کو ڈراتا ہے بلکہ یہ طبقہ تو اپنے سائے ہی سے خوفزدہ ہے، اس کے پاس سوچنے سمجھنے کی صلاحیت ہی نہیں ہے۔ یہ غیر ملکی تصورات یا اپنے تخیلات کے شناور ہیں، یہ ہمارے انگلش بولنے والے طبقے یا نام نہاد سول سوسائٹی جو کسی پوش علاقے کی مارکیٹ میں کیمروں کے سامنے موم بتیاں جلا کر اپنے فرائض منصبی سے دستبردار ہو جاتی ہے، کے بس کی بات نہیں کہ ان مذہبی افواج کے مد مقابل آئیں… پاکستان کا اصل مسئلہ غلط تصورات کے مارے ہوئے جنرل اور نااہل سیاستدان ہیں اور جب تک یہ درست نہیں ہوتے، مولویوں کی افواج پیش قدمی کرتی رہیں گی۔
مجھے متذکرہ کالم میں جن امور سے اختلاف ہے،پہلے ان کا تذکرہ ہو جائے میرا پہلا اختلاف یہ ہے کہ ملک میں انٹی انڈیا فضا جنرل ضیاء الحق سے پہلے ذوالفقار علی بھٹو نے گرم کی تھی جب انہوں نے سلامتی کونسل میں جنگ بندی کی قرارداد پر تقریر کرتے ہوئے انڈیا سے ایک ہزار سال تک جنگ کرنے کا اعلان کیا تھا، اسی طرح ”تحریک نظام مصطفےٰ “ کے دوران ”مولوی“ کے سامنے ہتھیار ڈالنے والے بھی بھٹو مرحوم ہی تھے۔ یہ تاریخی حقائق ہیں برادرم ایاز امیر کے کالم سے ایک تاثر یہ بھی ابھرتا ہے جیسے انڈیا پاکستان کے وجود کا دشمن نہیں ہے، میں اس تاثر سے متفق نہیں ہوں، مجھے جب کبھی انڈیا جانے کا اتفاق ہوا ہے، وہاں تقریباً ہر محفل میں حتیٰ کہ ادبی کانفرنسوں میں بھی کبھی بالواسطہ اور کبھی بلاواسطہ اکھنڈ بھارت کی بات کی جاتی ہے اور پاکستان کے وجود پر حملے کئے جاتے ہیں، ایسا سرکاری اور غیر سرکاری دونوں سطحوں پر ہوتا ہے، اس ضمن میں دیدہ دلیری کی انتہا یہ ہے کہ مشرقی پنجاب کے وزیراعلیٰ جب ہمارے پنجاب کے وزیراعلیٰ چودھری پرویز الٰہی کی دعوت پر لاہور آئے تو انہوں نے اپنے اعزاز میں دیئے گئے استقبالیہ میں اپنی تقریر کے دوران ہمارے وزیراعلیٰ کی موجودگی میں اکھنڈ بھارت کی بات کی۔ یہ سب باتیں چھوڑیں، مشرقی پاکستان کی علیحدگی میں ہمارے ”ٹائیگر جرنیل“ بعض سیاستدانوں اور ہماری غیر منصفانہ پالیسیوں کا جو دخل تھا، وہ اظہر من الشمس ہے لیکن پاکستان کو دو ٹکڑے کرنے کے لئے مکتی باہنی کی تشکیل اور مشرقی پاکستان پر بھارتی فوج کا بھرپور حملہ انڈیا کی پاکستان دشمنی کا ناقابل تردید ثبوت ہے۔ (جاری ہے

http://search.jang.com.pk/details.asp?nid=499324

فی سبیل اللہ فساد اور فی سبیل اللہ جہاد!…روزن دیوار سے …عطاء الحق قاسمی… (دوسری و آخری قسط)

میرا اختلاف صرف یہاں تک ہے تاہم میں پوری دیانتداری سے محسوس کرتاہوں کہ انڈیا کے مذموم عزائم سے محفوظ رہنے کے لئے ہمیں اپنے گھوڑے تیار رکھنا چاہئیں لیکن آج کے دور میں یہ گھوڑے صرف ایٹمی میزائل پر مبنی نہیں ہیں جن گھوڑوں کی ہمیں اب شدید ضرورت ہے۔ ان میں سرفہرست معاشی اور سیاسی استحکام کے گھوڑے ہیں، ہمیں انڈیا سے جنگ کرنے کا خیال دل سے نکال دینا چاہئے، اس جنگ کے نتیجے میں ہم دونوں ایک دوسرے کو ہلاک تو کرسکتے ہیں لیکن یہ جنگ ہمیں پتھر کے زمانے میں واپس لے جائے گی، ہمیں صرف ملک کو ترقی کی راہ پر گامزن کرنا ہے، اس کے لئے معاشی استحکام، سیاسی استحکام ،اداروں کو مضبوط کرنا نیز دہشت گردی اورہر قسم کی جنونیت کا خاتمہ ہماری اولین ضرورت ہیں جبکہ صورتحال یہ ہے کہ ہمارے تمام ادارے تباہ ہوچکے ہیں۔
معیشت آخری سانس لے رہی ہے ،رواداری اور برداشت کا خاتمہ ہو چکا ہے، سیاسی استحکام نام کی کوئی چیز نظر نہیں آتی، گورنمنٹ کی رٹ قصہٴ پارینہ بن چکی ہے، اسلحہ اور بارود سے گودام بھرے ہوئے ہیں، لوٹ مار، قتل و غارت گری، ٹارگٹ کلنگ، کرپشن ہمارے وجود کو دیمک کی طرح چاٹ رہی ہے، ہر شخص مفتی بنا ہوا ہے اور اس کے فتوے کے سامنے کوئی ٹھہر نہیں سکتا جبکہ بے شمار خرابیوں اور اپنی بنیاد میں مضمر تباہیوں کے باوجود انڈیا ترقی کی راہ پر بھی گامزن ہے۔ اس کے سامنے ہماری کرنسی کی حیثیت افغانی جتنی رہ گئی ہے، ہمارے تقریباً دو سو روپے ان کے ایک سوروپے کے برابر ہیں، ان کے تمام ادارے بہترین حالت میں کام کر رہے ہیں، اب جنگیں ہتھیاروں سے نہیں لڑی جاتیں، اتحاد و استحکام کی دوڑ میں جیتنے والا ہی کامیاب و کامران کہلاتا ہے۔ ہم نے انڈیا سے یہ جنگ لڑنا ہے اور اس میں کامیاب ہونا ہے۔ سو برادرم ایاز امیر نے میرے خوبصورت وطن پاکستان کو بد صورت بنانے والے جن عوامل کا ذکر کیا ہے، مجھے اس سے سو فیصد اتفاق ہے۔ میری ان تمام اداروں، جماعتوں اور افراد سے دست بستہ استدعا ہے کہ وہ اب پاکستان پر رحم کریں۔ یہ ر حم دراصل وہ خود پر اور اپنی آنے والی نسلوں پر بھی کریں گے کیونکہ اگر خاکم بدہن پاکستان کو کچھ ہوتا ہے تو اس کی زد میں وہ بھی آئیں گے اور ان کی وہ سب بادشاہیاں ختم ہو جائیں گی جو صرف اور صرف پاکستان کے دم قدم سے ہیں۔
میں ایاز امیر صاحب کے اس تھیسز سے سو فیصد اتفاق کرتا ہوں کہ پاکستان کے لئے تباہ کن پالیسیاں ہمارے انگریزی بولنے والے سیکولر لوگوں نے بنائی ہیں جن میں سیاستدان، بیورو کریٹ اور جی ایچ کیو شامل ہیں، ”مولوی“ نے صرف ان پالیسیوں سے فائدہ اٹھایا ہے اور وہ قوم کو تقسیم کرنے میں کامیاب ہوگیا ہے، اس ضمن میں ان کی سب سے اہم بات یہ ہے کہ ”مولوی“ حکمران طبقے کو نہیں ڈراتا بلکہ یہ طبقہ تو اپنے سائے ہی سے خوفزدہ ہے اور یہ کہ پاکستان کا اصل مسئلہ غلط تصورات کے مارے جرنیل اور نااہل سیاستدان ہیں اور جب تک یہ درست نہیں ہوتے، مولویوں کی افواج پیش قدمی کرتی رہیں گی!
اس میں کچھ سیاستدانوں اور کچھ جرنیلوں کے ساتھ ”بدنیت“ کے لفظ کا اضافہ بھی کرلیں تو بات زیادہ مکمل ہو جائے گی، مولویوں سے ڈرنے والا حکمران طبقہ صحیح علمائے کرام کے سائے سے بھی دور رہتا ہے، اس نے ہمیشہ سیاسی اور فسادی مولوی کی سرپرستی کی ہے ۔ کالم کو مزید طوالت سے بچانے کے لئے میں اس کا جھٹکا کرتے ہوئے آخر میں صرف یہ کہوں گا کہ ہمارے بزدل حکمران فسادی عناصرسے گٹھ جوڑ کرتے رہیں گے، یہ کام ہمارے جرنیل بھی کرتے رہے ہیں اور اس درد کا مداوا بھی انہی کو کرنا ہے جنہوں نے قوم کو یہ درد دیا ہے چنانچہ میں جنرل اشفاق پرویز کیانی سے، جو بہت اچھی شہرت کے حامل ہیں اور جنہوں نے فوج کو صحیح پٹڑی پر واپس لانے کی کئی کوششیں کی ہیں، گزارش کروں گا کہ و ہ جید علمائے کرام کے اعلیٰ مقام اور مرتبے کو برقرار کھتے ہوئے فسادی عناصر پر صرف ایک تفصیلی نظر ڈالیں۔ اس عقل مند مخلوق کے لئے یہ اشارہ کافی ہوگا ملک و قوم کو مزید تباہی سے بچانے کے لئے انہیں یہ کام ”فی سبیل اللہ“ کرنا ہوگا۔ امید ہے وہ ”فی سبیل اللہ“ کا مطلب سمجھ گئے ہوں گے اور یہ بھی کہ اگر فی سبیل اللہ فساد ہوسکتا ہے تو اس کے خاتمے کے لئے فی سبیل اللہ جہاد بھی کیا جاسکتا ہے مجھے یقین ہے جنرل کیانی یہ کام ضرور کریں گے، باقی رہے کرپٹ اور بزدل حکمران، انہیں ہم خود سنبھال لیں گے۔

http://search.jang.com.pk/details.asp?nid=499636