اب افسوس کا فائدہ……سویرے سویرے…نذیر ناجی

12اکتوبر کو‘ چند منٹ کے لئے اپنے عہدے پر فائز رہنے والے سابق چیف آف آرمی سٹاف جنرل ضیاالدین نے ”جیو“ کے افتخار احمد کو اپنے پہلے طویل انٹرویو میں بعض دلچسپ باتوں کا انکشاف کیاہے۔ جن میں سب سے اہم یہ ہے کہ جنرل پرویزمشرف اور ان کے ساتھی باقی جنرلوں کو اقتدار پر قبضے کے بعد‘ آن بورڈ لانے کی کوششیں کرتے رہے۔ اس سے ظاہر ہوتا ہے کہ بغاوت کا منصوبہ یا سازش نامکمل تھی۔ سازش کے مرکزی کردار پرویز مشرف کے علاوہ جنرل محمود‘ جنرل عزیز ‘جنرل جاویدحسن‘ بریگیڈیئرصلاح الدین اور چند ایک دوسرے تھے۔ اقتدار پر قبضے کے بعد بھی سازشیوں کا ٹولہ اپنے مستقبل کے بارے میں فکرمند تھااور وہ دوسرے جنرلوں کو ایک ایک کر کے یہ کہہ کر اپنے ساتھ ملاتے رہے کہ وہ معاملات پر کنٹرول حاصل کر چکے ہیں۔ یہاں میں ایک بات کا اضافہ کروں گا اور وہ یہ کہ پرویزمشرف کا عدالتی ٹرائل نہیں بھی ہوتا‘ تو کم از کم وزارت دفاع کو ایک فیصلہ ضرور کر دینا چاہیے کہ جنرل ضیاالدین کا گناہ کیا تھا؟ انہیں جائز طریقے سے چیف آف آرمی سٹاف بنایا گیا تھا۔ ان کا امتیازی مقام یہ ہے کہ خود وزیراعظم نے ان کے کندھوں پر رینکس لگائے۔ جبکہ اقتدار پر قبضہ کرنے والے پرویزمشرف برطرف کئے جا چکے تھے۔ ہر اصول اور ضابطے کے مطابق‘ بغاوت کے وقت جنرل ضیاالدین ہی چیف آف آرمی سٹاف تھے۔ان کی بحالی اور پھر جبری ریٹائرمنٹ کو ضابطے کے اندر لاتے ہوئے‘ ان کی اصل پوزیشن بحال کر کے انہیں سابق چیف آف آرمی سٹاف کا پروٹوکول دیا جانا چاہیے اور وہی پنشن اور مراعات ملنا چاہئیں‘ جن پران کا حق ہے۔
جہاں تک پرویزمشرف کی برطرفی کے حکم پر عملدرآمد میں ناکامی کا سوال ہے‘ تو اس کی ذمہ داری جنرل (ر) ضیاالدین پر نہیں ڈالی جا سکتی۔فوجی عہدوں پر تقرری اور برطرفی کے احکامات پر عملدرآمد وزیردفاع اور سیکرٹری دفاع کا کام ہے۔ مجھے نہیں پتہ کہ پرویزمشرف کی برطرفی کے حکم پر عملدرآمد‘ کا طریقہ کار کس نے طے کیا تھا؟ اگر یہ وزیراعظم نے کیا تو عملدرآمد کے وقت وزیردفاع اور سیکرٹری دفاع کہاں تھے؟ کیا انہیں معلوم نہیں تھا کہ ان احکامات پر عملدرآمد نہیں کیا جا سکے گا؟ خود چیف آف آرمی سٹاف بننے والے جنرل ضیاالدین آئی ایس آئی کے ڈائریکٹر جنرل تھے۔ ان کی دو ذمہ داریاں تھیں۔ انٹیلی جنس چیف کی حیثیت سے صورتحال کی خبر رکھنا اور نئے آرمی چیف کی حیثیت سے اپنے ادارے کے متعلق یہ معلومات رکھنا کہ کیا وہ نئے چیف کی تقرری کے لئے تیار ہے یا نہیں؟ اگر ذرا بھی شک ہوتا‘ تو پہلے اس حکم پر عملدرآمد کو ممکن بنانا ضروری تھا۔ ایسا کیوں نہ کیا گیا؟

جنرل ضیاالدین نے اسی انٹرویو میں انکشاف کیا کہ پرویزمشرف 17ستمبر 1999ء کو حکومت ختم کرکے اقتدار سنبھالنے کا فیصلہ کر چکے تھے۔ میرا خیال ہے یہ وہی سازش تھی جس کی 14ستمبر کو میں نے وزیراعظم کو اطلاع کر دی تھی۔ مجھے بطور صحافی اپنے ذاتی ذرائع سے‘ اس سازش کی تھوڑی بہت سن گن مل چکی تھی۔ حامد میر نے خصوصی طور پر 14 ستمبر کو میرے پاس آ کر بڑے اعتماد سے یہ بتایا کہ ”آپ وزیراعظم کو اطلاع کر دیں کہ انہیں ہٹانے کی سازش ہو چکی ہے اور وہ اپنے بچاؤ کی تدبیر کر لیں۔“ اسی دن میں وزیراعظم سے ملاقات کا وقت لے کر ‘شام ساڑھے چار بجے وزیراعظم ہاؤس کے رہائشی پورشن میں ڈرائنگ روم کے اندر بیٹھے وزیراعظم کی خدمت میں حاضر ہوا‘ تو ان کے ساتھ ملٹری سیکرٹری بریگیڈیئر جاوید بھی بیٹھے تھے۔ میں نے ان سے تخلیے میں بات کرنے کی درخواست کی۔ وزیراعظم نے حسب عادت یہ کہتے ہوئے مجھے بات کرنے پر مجبور کیا کہ بریگیڈیئر صاحب اپنے ہی آدمی ہیں۔ مجھے اب تک اپنا جملہ اچھی طرح یاد ہے۔ میں نے کہا تھا ”میں انہی کے محکمے کی بات کرنا چاہتا ہوں۔ اگر آپ کا حکم ہے تو میں ان کے سامنے کہہ دیتا ہوں۔“ جس پر میں نے اپنے ذرائع سے ملنے والی افواہوں اور حامد میر کی طرف سے دیا گیا پیغام‘ ان کے نام سے دہرایا کہ ”آپ کو نومبر سے پہلے رخصت کرنے کا منصوبہ بن چکا ہے“ تو انہوں نے بھرپور اعتماد کے ساتھ جواب دیا ”مجھے کون ہٹا سکتا ہے؟ مارچ میں ہمیں سینٹ میں بھی دو تہائی کی اکثریت ملنے والی ہے۔“ جس پر میں نے کہا تھا کہ ”آپ کو مارچ تک پہنچنے ہی نہیں دیا جائے گا۔“ مجھے بادل ناخواستہ ایک بلاوجہ کی جوابدہی کی صورتحال کا سامنا کرنا پڑا۔ ایک بات پر میں آج تک افسوس کرتا ہوں کہ اگر ابوظہبی کے سفر کے دوران ہی مجھے اصل منصوبے کا پتہ چل جاتا‘ تو میں اس پر پورا زور لگا دیتا کہ وزیراعظم‘ پرویزمشرف کی برطرفی کا حکم ایوان صدر بھیج کر جاری کر کے اہل خاندان کے ساتھ عمرے پر روانہ ہو جائیں اور ان کی عدم موجودگی میں ایوان صدر سے سیکرٹری دفاع کے ذریعے برطرفی کے حکم پر عملدرآمد کرایا جائے۔یہ کام پرویزمشرف کی وطن واپسی کے بعد ہوتا۔ یہ جنرل افتخار اور پرویزمشرف جانتے کہ انہیں ایک دوسرے کے ساتھ کیا کرنا ہے؟ وزیراعظم سازش کے اثرات سے باہر نکل چکے ہوتے۔ اگر مشرف اقتدار پر قبضہ کرتا‘ تو وزیراعظم اپنا آئینی حق لینے کے لئے آزاد ہوتے اور اگر اس آئینی حکم پر عملدرآمد ہو جاتا‘ تو جنرل مشرف کی حیثیت ایک پرکٹے پرندے جیسی ہوتی۔ مجھے یقین ہے کہ وزیراعظم کی ٹیم میں ماضی کے تجربوں سے واقفیت رکھنے والا کوئی نہیں تھااور جسے یہ سب کچھ معلوم تھا‘ اسے اصل منصوبے کا اندازہ ملتان ایئرپورٹ پر صبح کے وقت ہوا۔ ملتان میں بھی بتا دیا جاتا تو میں وزیراعظم کو فیصلے پر عملدرآمد سے پہلے عمرے پر جانے کا مشورہ ضرور دیتا۔ مگر اب افسوس کا کیا فائدہ؟ جس تاریخی المیے کو جنم لینا تھا‘ اس کے تو بچے بھی جوان ہو رہے ہیں۔

http://search.jang.com.pk/archive/details.asp?nid=480143