جو تین صوبے اس وقت انتخابی دھماکوں کی زد میں ہیں ان میں سب سے زیادہ مساوی وارداتیں بلوچستان میں ہو رہی ہیں۔جہاں دائیں یا بائیں، مذہبی و غیر مذہبی، قوم پرست یا وفاق پرستوں سمیت ہر طرح کی انتخابی مخلوق نشانے پر ہے۔جبکہ سندھ میں ایم کیو ایم اور پیپلز پارٹی کو دھماکے داری کے لیے منتخب کیا گیا ہے ۔مگر عوامی نیشنل پارٹی واحد جماعت ہے جسے پنجاب کو چھوڑ کے پشاور سے چمن اور چمن سے کراچی تک نشانہ بنایا جا رہا ہے۔

ب لگ یہ رہا ہے کہ انتخابی سیاست کرنے والی آدھی جماعتوں کو یہ پیغام دیا جا رہا ہے کہ قدم بڑھاؤ اے جماعتوں ہم تمہارے ساتھ ہیں۔اور باقی آدھی جماعتوں کو کہا جا رہا ہے کہ اگر تم نے مغرب سے درآمد کردہ جمہوریت اور غیر شرعی انتخابی نظام کی سیاست جاری رکھی تو پھر تم ہم میں سے نہیں۔

پہلے سیاسی نسل کی سلیکشن مبینہ طور پر ایجنسیاں کرتی تھیں۔اب یہ کام نان سٹیٹ ایکٹرز کے ہاتھ میں آ گیا ہے۔یعنی دباؤ برقرار ہے صرف دباؤ ڈالنے والے بدل گئے ہیں۔
اگرچہ یہ سوال بھی دبے الفاظ میں اٹھ رہا ہے کہ مسلم لیگ ن اور قاف، تحریکِ انصاف، جماعتِ اسلامی اور جمیعت علمائے اسلام کے پاس ایسی کیا بم پروف گیدڑ سنگھی ہے جس سے ایم کیو ایم، اے این پی اور پیپلز پارٹی محروم ہیں اور یہ بھی کہا جا رہا ہے کہ انتخابی مہم کا رونق میلہ دیکھنا ہو تو پنجاب میں جا کر دیکھیے۔
مگر جنہوں نے بھی دھماکے دار حکمتِ عملی بنائی ہے وہ اتنے بےوقوف نہیں۔بھلا وہ کیوں چاہیں گے کہ ہر جگہ دھواں اور لاشیں پھیلا کر مشرق، مغرب، دائیں، بائیں کی اکثر سیاسی قوتوں کو ایک پلیٹ فارم پر اسی طرح جمع ہونے کا موقع مل جائے جیسا کہ اسلام آباد میں طاہر القادری کے دھرنے کے ردِعمل میں ہوا تھا۔سیاسی قوتوں کو تقسیم رکھنے کی ایک ہی صورت ہے کہ ہر ایک کو الگ الگ لاٹھی سے ہانکا جائے۔باقی کام خود یہ سیاستدان ہی کر لیں گے۔ بظاہر دہشت ناکوں کی یہ عسکری حکمتِ عملی خاصی کامیاب ہے کہ ایک ایک کو الگ الگ کر کے مارو تاکہ سب مل کے تمہیں نہ ماریں۔
تو کیا اسٹیبلشمنٹ کو بالکل اندازہ نہیں تھا کہ دہشت ناکوں کی ممکنہ انتخابی سٹریٹیجی کیا ہوگی؟ اب جبکہ پولنگ میں صرف 13 دن رہ گئے ہیں یہی طے نہیں ہو سکا کہ پولنگ سٹیشنوں کا تحفظ کوئی ایک ادارہ کرے گا یا سب مل کے کریں گے۔اگر کنفیوژن اور ادارتی فیصلہ سازی کا یہی حال ہے تو دو تہائی اکثریت سے جیتنے والی پارٹی بھی ان اداروں اور عمل داروں کے ہوتے نیا کیا کر لے گی؟

حالات کو قابو میں لانے کی خاطر کچھ نیا سوچنے کے لیے وقت، حاضر دماغی اور بنیادی حقائق کا میز پر ہونا ضروری ہے اور یہاں تو اکثر قائدین نے اپنا منشور ہی پوری طرح نہیں پڑھا تو نوشتہِ دیوار کیا پڑھ پائیں گے۔

اب ایک ہی طریقہ ہے خود کو پرسکون ظاہر کرنے کا۔جیسے ہی چیخ و پکار اور آہ و بکا کان میں پڑے ریڈیو یا ٹی وی کی آواز اونچی کر لو۔دنیا نارمل محسوس ہونے لگے گی۔۔۔

الگ الگ مارو
وسعت اللہ خان
بی بی سی اردو ڈاٹ کام، کراچ

http://www.bbc.co.uk/urdu/interactivity/2013/04/130428_baat_se_baat_zz.shtml

’انہیں تکلیف ہے کہ ہم مُلّا کیوں نہیں ہیں‘
آخری وقت اشاعت: بدھ 17 اپريل 2013 ,

پاکستان میں انتخابی مہم کے دوران شدت پسندوں کے حملوں کا سب سے زیادہ نشانہ بننے والی جماعت عوامی نیشنل پارٹی کے سینیئر رہنما غلام احمد بلور نے کہا ہے کہ پاکستان میں کچھ طاقتیں ایسی ہیں جو اقتدار میں آنا چاہتی ہیں اور وہ طالبان کے ساتھ مل کر انہیں راستے سے ہٹانا چاہتی ہیں۔
بی بی سی اردو سے بات کرتے ہوئے انہوں نے کہا ’کچھ طاقتیں ہیں جو اقتدار میں آنا چاہتی ہیں اور طالبان بھی چاہتے ہیں کہ وہ اقتدار میں آئیں۔ اور اسی لیے وہ ہمیں راستے سے ہٹانا چاہتے ہیں۔‘

نامہ نگار عزیز اللہ خان کے مطابق انہوں نے کہا کہ عوامی نیشنل پارٹی پاکستان کی سالمیت اور استحکام کی بات کرتی ہے۔ ’ہم 1973 کے آئین کی بات کرتے ہیں اور ہم مسلمان ہیں اور مسلمانی کی بات کرتے ہیں۔ لیکن ہم مُلّا نہیں ہیں اور ان کو تکلیف یہ ہے کہ ہم مُلّا کیوں نہیں ہیں۔‘

پاکستان میں نگراں سیٹ اپ کے آنے اور انتخابات کے اعلان کے بعد سے اے این پی کے رہنماؤں اور جلسوں پر سات حملے ہو چکے ہیں جن میں متعدد افراد ہلاک اور زخمی ہوئے ہیں۔
یاد رہے کہ کالعدم تنظیم تحریک طالبان پاکستان نے کچھ عرصے قبل عوام کو متنبہ کیا تھا کہ وہ اے این پی، پی پی پی اور متحدہ قومی موومنٹ کے جلسوں سے دور رہیں۔
اے این پی کو ان حملوں کے باعث اپنی انتخابی مہم محدود کرنی پڑی ہے۔ جماعت نے انتخابی جلسوں کی تعداد میں کمی کر دی ہے اور ووٹرز تک پہنچنے کے لیے لائحہ عمل تیار کیا جا رہا ہے۔

منگل کی رات خود غلام احمد بلور پر بھی اندرون پشاور میں خودکش حملہ کیا گیا تھا جس میں سترہ افراد ہلاک ہوئے اور وہ خود زخمی ہو گئے تھے۔ بدھ کو بھی چارسدہ میں اے این پی کے ایک مقامی رہنما پر ریموٹ کنٹرول بم سے حملہ کیا گیا جس میں دو افراد زخمی ہونے کی اطلاعات ہیں۔

غلام احمد بلور نے کہا کہ وہ اور ان کی جماعت ایسی کارروائیوں سے خوف زدہ نہیں ہیں بلکہ وہ میدان میں رہیں گے اور مقابلہ کریں گے۔

اے پی سی میں فیصلے
انتخابات کے تین دنوں میں پولنگ سٹیشنز پر کوئیک ریسپانس فورس موجود رہے گی اور اس بارے میں فوجی حکام سے بھی بات چیت کی گئی ہے۔
انتخابی جلسے سے اڑتالیس گھنٹے قبل مقامی پولیں کو آگاہ کیا جائے گا۔
ہر جماعت رضا کاروں کی ایک ٹیم تشکیل دے گی جو اپنے کارکنان اور مہمانوں کی شناخت کرے گی جن کو جلسوں میں آگے جانے اجازت دی جائے گی۔
جلسوں کا بہت پہلے سے اعلان نہیں کیا جائے گا بلکہ چند گھنٹوں قبل اس کا اعلان کیا جائے گا۔
نگراں وزیر اعلیٰ صدر زرداری کو درخواست کریں گے کہ ایف سی کے دستے واپس کیے جائیں تاکہ ہر امیدوار کو پانچ پانچ اہلکار فراہم کیے جائیں۔
نگراں وفاقی وزیر داخلہ ملک حبیب خان نے بدھ کو صوبہ خیبر پختونخوا کے آئی جی پولیس کو حکم دیا ہے کہ وہ اے این پی کی سکیورٹی بحال کرے۔
ادھر پشاور میں انتخابات کے لیے سکیورٹی کی صورتحال پر نگراں حکومت کی جانب سے بلائی جانے والی آل پارٹیز کانفرنس میں فیصلہ کیا گیا ہے کہ حکومت تمام امیدواروں کو پانچ مسلح محافظ فراہم کرے گی اور سیاسی جماعتیں چار دیواری کے اندر جلسے منعقد کریں گے۔
اجلاس میں یہ فیصلہ بھی ہوا کہ انتخابات کے تین دنوں میں پولنگ سٹیشنز پر کوئیک ریسپانس فورس موجود رہے گی جو کسی بھی وقت کہیں بھی پیچیدہ صورتحال سے نمٹنے کے لیے تیار ہو گی اور اس بارے میں فوجی حکام سے بھی بات چیت کی گئی ہے۔
سیاسی تجزیہ کار عقیل یوسفزئی کے مطابق افغانستان میں دو ہزار چودہ میں امریکی انخلاء کے بعد پاکستان میں بعض قوتیں چاہتی ہیں کہ آزاد خیال سیاسی جماعتوں کو دیوار کے ساتھ لگا دیا جائے اور پشاور میں ایسی حکومت قائم ہو جو افغانستان کے طالبان کے ساتھ اچھے تعلقات رکھ سکے۔
انہوں نے کہا ’افغانستان سے امریکی فوج کا انخلاء ہو رہا ہے اور شاید پاکستانی اسٹیبلشمنٹ میں کچھ حصے ہیں یا طالبان کے کچھ گروہ یا القاعدہ کی نظریں پشاور پر ہیں کہ اگر انخلاء کے بعد وہاں کوئی ان قوتوں کا کردار بنتا ہے تو پشاور میں وہ نہیں چاہیں گے کہ اے این پی یا پیپلز پارٹی جیسی سیاسی جماعتیں اقتدار میں آئیں۔‘
مبصرین کا یہ بھی کہنا ہے کہ نگران حکومت اور الیکشن کمیشن کی ذمہ داری ہے کہ وہ تمام جماعتوں اور امیدواروں کو تحفظ کا یکساں ماحول فراہم کرے تاکہ شفاف انتخابات منعقد کرائے جا سکیں۔

http://www.bbc.co.uk/urdu/pakistan/2013/04/130417_election2013_attacks_anp_rh.shtml

Good article, good comments. Blessed.