مسلم لیگ نون کے ووٹر کہاں گئے؟

علی سلمان
بی بی سی اردو ڈاٹ کام، لاہور
مسلم لیگ نون ضمنی انتخابات کی ’اگنی پرتکشیا، یعنی آگ میں سے گزرنے کی آزمائش‘ کے بعد بظاہر اپنی کامیابی کا دعوی کر رہی ہے لیکن لگتا ہے کہ اس کے لیڈران اس بات سے بخوبی واقف ہیں کہ ان کی کامیابیوں کا گراف وہ نہیں رہا جو سنہ دوہزار آٹھ کے عام انتخابات میں تھا۔

نواز لیگ کی کامیابیوں کا گراف وہ نہیں رہا جو سنہ دوہزار آٹھ کے عام انتخابات میں تھا

یہ صورتحال مسلم لیگ نون کے لیے پریشان کن لگتی ہیں۔

ہوسکتا ہے کہ اس کے لیڈران کا ووٹ میں کمی کا برسرعام اعتراف شاید پاکستانی سیاست کے لحاظ سے کچھ راست اقدام نہ ہو۔

ممکن ہے بظاہر کسی بڑی ہزیمت سے بچ جانے پر مسلم لیگ نون کے رہنما ایک دوسرے کو مبارکباد دیتے دکھائی دیتے ہوں لیکن میرے خیال میں معاملات کی سمجھ بوجھ رکھنے والے لیڈروں میں مستقبل کے طلسمی بلوریں گلوب میں جھانکنے کی اہلیت موجود ہے جو شاید کچھ منفی پشنگوئیوں کا مرکز بنا ہوا ہے۔

بات ذرا دلائل اور اعداد وشمار کی روشنی میں کرنا ہی مناسب ہے۔

سنہ دوہزار آٹھ کے عام انتخابات میں پاکستان میں بالعموم پیپلز پارٹی اور پنجاب میں مسلم لیگ نون کے حق میں اکثریتی ووٹ پڑا تھا۔ پیپلز پارٹی نے مرکز میں اور مسلم لیگ نون نے پنجاب کا تخت سنبھالا۔

تجزیہ نگار وں کا کہنا ہے کہ ضمنی انتخابات میں عام طور پر نوے فی صد کامیابی صوبائی حکومت کو حاصل ہوتی ہے اور اگر فیصلہ ہار جیت کی بنیاد پر کیا جائے تومسلم لیگ نون یہ دعوی کرسکتی ہے کہ اس نے ضمنی الیکشنوں میں یہ روایت برقرار رکھی ہے۔

لیکن یہ آدھا سچ ہے باقی کی نصف حقیقت یہ ہے کہ مسلم لگ نون کو ڈالے جانے والے ووٹوں میں تیس فی صد تک کمی ہوئی ہے اور اگر اس کے مخالفین کو پڑنے والے ووٹوں سے موازانہ کیا جائے تو نون کی نسبت مخالفین کی مقبولیت بڑھتی دکھائی دے رہی۔

تازہ ترین مثال تو گجرات کےانتخابات ہیں جہاں سنہ دوہزار آٹھ میں اپوزیشن کی مسلم لیگ نون اور پیپلز پارٹی کے ووٹ ملا کر چھتیس ہزار سے زائد تھے اور جیت بھی مسلم لیگ نون کے حصے میں آئی تھی۔

لاہور میں نواز شریف کے روایت حلقے کے ضمنی انتخاب میں نون کو ڈلنے والے ووٹوں میں تیئس ہزار کی کمی ہوئی اور ہ مسلم لیگ نون کی لیڈ ساٹھ ہزار سے کم ہوکر پینتیس ہزار پر آگئی۔
اس بار دونوں پارٹیاں حکمران اور اتحادی تھیں لیکن ووٹ ماضی کے مقابلے میں نوہزار کم رہے۔ دوسری جانب اپوزیشن پارٹی مسلم لیگ قاف کے ووٹ میں بھی اتنا ہی اضافہ ہوگیا۔

مسلم لیگ نون کو پہلا دھچکا چند مہینے قبل مانسہرہ کے ضمنی انتخابات میں لگا تھا جہاں مسلم لیگ نون کا امیدوار واضح فرق سے ہارا لیکن مسلم لیگ کے قائد نواز شریف نے یہ کہہ کر اپنی پارٹی کی پوزیشن واضح کی تھی کہ دوہزار آٹھ کے الیکشن میں جمعیت علمائے اسلام یعنی جے یوآئی سے اس سیٹ پر انتخابی ایڈجسٹمنٹ ہوئی تھی جو اس بار نہیں ہوسکی ۔ ان کے بقول اسی لیے جے یوآئی کی فتح کو مسلم لیگ نون کی غیر مقبولیت قرار نہیں دیا جاسکتا۔

چلیئے مان لیا۔۔۔ لیکن راولپنڈی میں کیا ہوا؟ جہاں مسلم لیگ کے مدمقابل واحد سنجیدہ امیدوار شخ رشید کے ووٹوں میں تو بائیس ہزار کا اضافہ ہوگیا لیکن مسلم لیگ نون کے ووٹ تیرہ ہزار کم ہوگئے۔

اس کو بھی چھوڑیں لاہور آجائیں جسے پندرہ برس سے نواز شریف کا قلعہ قرار دیا جارہا ہے، یہاں بھی مسلم لیگ نون کی چھوڑی ہوئی سیٹ این اے ایک سو تیئس پر الیکشن ہوا تھا۔ پیپلز پارٹی نے بھی مسلم لیگ نون کی حمایت کی لیکن نہ صرف نون کو ڈلنے والے ووٹوں میں تیئس ہزار کی کمی ہوئی بلکہ مسلم لیگ نون کی لیڈ ساٹھ ہزار سے کم ہوکر پینتیس ہزار پر آگئی۔

جھنگ کے ضمنی انتخابات میں اپنی سیٹ بچانے کے لیے مسلم لیگ نون کے وزیروں کو کالعدم سپاہ صحابہ کے جلسوں میں شرکت کرنا پڑی اور اپوزیشن رکن قومی اسمبلی شیخ وقاص احمد کے بقول نون کے وزیر ووٹوں کی خاطر انسداد دشت گردی ایکٹ کے فورتھ شیڈول کے زمرے میں آنے والے افراد کی حمایت حاصل کرتے رہے۔

بہاولنگر کے ضمنی انتخابات میں مسلم لیگ نون اگر دل سے پیپلز پارٹی کے ساتھ تھی تو پھر ضیاء لیگ کے امیدوار کی کامیابی بھی مسلم لیگ نون کے مخالف پلڑے میں ڈالی جاسکتی ہے۔

مبصرین کا کہنا ہے کہ پیپلز پارٹی کی مقبولیت میں فرق کا آغاز آصف زرداری کی صدارت سنبھالنے کے بعد شروع ہوگیا تھا لیکن مسلم لیگ نون کی عوام میں پذیرائی کی کمی کا واضح اشارہ ضمنی انتخابات میں کھل کر سامنے آیا ہے۔

یہاں اس بات کو نظر انداز نہیں کیا جاسکتا کہ ضمنی انتخابات ایسی صورتحال میں ہوئے ہیں جہاں پنجاب میں خود شہباز شریف حکمران ہیں اور مرکز میں شریف بردران کے نخرے اٹھانےوالی والی پیپلز پارٹی کی حکومت ہے۔

ان ضمنی انتخابات کاموازانہ سنہ دوہزار آٹھ کے ان انتخابات سے کیا جارہا ہے جب پاکستان میں نواز شریف کے بدترین مخالف فوجی کمانڈو جنرل پرویز مشرف کی حکومت تھی۔

پنجاب کے دیہی علاقوں کے بارے میں کہا جاتا ہے کہ وہاں اس امیدوار کو کامیابی ملتی ہے جو تھانے کچہری میں اپنا اثر و رسوخ ثابت کرسکے اور شہری علاقوں میں وہ پارٹی کامیاب ہوسکتی ہے جو مستقبل کے سہانے خواب دکھا سکے
تو کہا جاسکتا ہے کہ موافق ترین حالات میں ہونے والے انتخابات کے نتائج بدترین حکومتی مخالفت کےدور میں ہونے والے الیکشن کے نتائج کے مقابلے میں گراوٹ کا شکارہیں۔

پنجاب کے دیہی علاقوں کے بارے میں کہا جاتا ہے کہ وہاں اس امیدوار کو کامیابی ملتی ہے جو تھانے کچہری میں اپنا اثر و رسوخ ثابت کرسکے اور شہری علاقوں میں وہ پارٹی کامیاب ہوسکتی ہے جو مستقبل کے سہانے خواب دکھا سکے۔

بلدیاتی نظام کو عملاً معطل کرنے کے بعد وزیر اعلی سے زیادہ تھانے کچہری پر عملدرآمد کرنے والا کوئی نہیں رہا تھا اور سہانے خواب دکھانےمیں بھی مسلم لیگ نون کی میڈیا ٹیم پاکستان میں لاجواب ہے لیکن اس کے باوجود مسلم لیگ نون کی بیلٹ باکس پر حمایت میں کمی اگر کسی بڑی تبدیلی کا اشارہ نہیں بھی ہے تو مسلم لیگ نون کے ان قائدین کے لیے پریشانی کا سبب ضرور ہونی چاہیے جنہیں رات کو سوتے میں بھاری مینڈیٹ کے خوش کن خواب آتے ہیں۔

یہاں دھاندلی کے ان الزامات کا ذکر نہ بھی کیا جائے جو مسلم لیگ قاف پنجاب حکومت پر عائد کرتی ہے اس کے باوجود حال ہی میں ہی سپریم کورٹ کے خوف یا احکامات کے نتیجے میں قومی اسمبلی کی دو اور صوبائی اسمبلی کی خالی ہونے والی ایک نشست حکمران مسلم لیگ نون کے لیےایک پل صراط ثابت ہوگی۔

مبصرین کا کہنا ہے کہ امن وامان اور معاشی تنگدستی سے پریشان پنجابی عوام کےروبرو جانے والے رہنماؤں کے لیے غلطی کی گنجائش نشتہ۔

http://www.bbc.co.uk/urdu/pakistan/2010/03/100325_pmln_votes_decreasing_why.shtml