’وعدے پورے نہ ہوئے تو طالبان سے لڑنا چھوڑ دیں گے‘

اگر آدیزئی اور بازید خیل کے عوام لشکر نہ بناتے تو طالبان پشاور پر کب کا قبضہ کرچکے ہوتے: لشکر سربراہ

پاکستان کے صوبہ خیبر پختونخوا کے مرکزی شہر پشاور کے مضافات میں طالبان مخالف لشکر کے سربراہ نے دھمکی دی ہے کہ اگر حکومت نے عسکریت پسندوں کے خلاف جاری جنگ میں ان سے کیے گئے وعدے پورے نہ کیے تو وہ شدت پسندوں کے خلاف لڑنا چھوڑ سکتے ہیں۔

پشاور کے مضافاتی علاقے ادیزئی میں قومی لشکر کے سربراہ دلاور خان نے بی بی سی سے گفتگو کرتے ہوئے کہا کہ پچھلے دو برسوں سے وہ ہزاروں مسلح رضاکاروں سمیت شدت پسندوں کے خلاف لڑائی لڑ رہے ہیں۔ انہوں نے کہا کہ حکومت نے ان سے کئی قسم کے وعدے کئے تھے جن میں ہتھیار، راشن اور تیل کی فراہمی وغیرہ شامل ہے لیکن ابھی کوئی بھی وعدہ پورا نہیں کیا گیا بلکہ اس دوران وہ خود اپنے وسائل سے جنگ لڑ تے رہے ۔

’ ہمارے وسائل ختم ہورہے ہیں۔ ہم میں مزید لڑنے کی سکت باقی نہیں رہی۔ اگر حکومت اپنے وعدے پوری کرتی ہے تو ٹھیک ہے ورنہ ہم مزید یہ لڑائی نہیں لڑ سکتے۔‘

دلاور خان کے بقول اب تک علاقے کے لوگ خود اپنا سامان استعمال کررہے تھے حالانکہ حکومت یہ سب چیزیں فراہم کرنے کے کئی مرتبہ وعدے کرچکی ہے۔

پاکستان میں دو ہزار آٹھ میں حکومت نے دہشت گردی کے خلاف جاری جنگ میں شدت پسندوں کو عام افراد سے لاتعلق کرنے کےلیے قبائلی لشکر بنانے کی حکمت عملی کا آغاز کیا تھا۔ تاہم اکثر علاقوں میں یہ حکمت عملی کامیاب ہوتی نظر نہیں آرہی بلکہ عسکریت پسندوں کی طرف سے لشکروں پر حملوں سے سینکڑوں افراد مارے جاچکے ہیں
آدیزئی پشاور شہر کے جنوب میں واقع ایک مضافاتی علاقہ ہے۔ یہ علاقہ عام طورپر اسے پشاور کی ڈیفنس لائن کہا جاتا ہے کیونکہ اس علاقے کی سرحدیں قبائلی علاقوں باڑہ، درہ آدم خیل اور ایف آر پشاور سے متصل ہیں۔ اس کے علاوہ پشاور شہر کے ایک اور مضافاتی علاقے بازید خیل میں بھی مقامی لوگوں نے عسکریت پسندوں کے خلاف لشکر تشکیل دیا ہوا ہے۔ یہ علاقہ بھی باڑے کے قبائلی علاقے سے ملا ہوا ہے۔

لشکر کے سربراہ کا کہنا ہے کہ اگر آدیزئی اور بازید خیل کے عوام لشکر نہ بناتے تو طالبان پشاور پر کب کا قبضہ کرچکے ہوتے۔

دلاور خان کے مطابق رمضان کے مہینے میں ان کے لشکر کے چند اہم ساتھی طالبان کے ایک خودکش حملے میں ہلاک ہوئے تھے لیکن ابھی تک حکومت کی طرف سے متاثرہ خاندانوں کو کوئی معاوضہ نہیں دیا گیا ہے۔

انہوں نے کہا کہ ’ ہم قربانی دے رہے ہیں اور حکومت کی جنگ لڑ رہے ہیں لیکن پھر بھی یہ سلوک ہورہا ہے۔‘

انہوں نے کہا کہ اگر ملک کے کسی اور علاقے میں اس قسم کا واقعہ پیش آتا تو دوسرے ہی دن متاثرہ خاندانوں کو معاوضہ دیا جاتا ہے۔

لشکر کے سربراہ نے مزید کہا کہ اب تک اس جنگ میں ان کے پینتالیس رضاکار ہلاک ہوچکے ہیں جن میں آدیزئی لشکر کے سربراہ عبد المالک ، نائب سربراہ حاجی علی احمد اور حاجی مراد سمیت کئی اہم افراد شامل ہیں۔

ایک سوال کے جواب میں انہوں نے کہا کہ انھیں طالبان کے خلاف لشکر بنانے کا خیال اس وقت آیا جب وزیرستان اور دیگر قبائلی علاقوں سے لاکھوں افراد بے گھر ہونے پر مجبور ہوئے۔

انہوں نے کہا کہ ’ قوم کے مشران نے مشاورت کی کہ علاقے میں آپریشن کی صورت میں وہ نقل مکانی کرکے کہاں جائیں گے۔ ’علاقہ تو نہیں چھوڑ سکتے، بچوں اور خواتین کا کیا ہوگا۔ اس لیے سب نے علاقے سے نکلنے کی بجائے طالبان کے خلاف ڈٹ جانے کا متفقہ فیصلہ کیا۔‘

جب ان سے سوال کیا گیا کہ یہ کیسے ممکن ہے کہ لشکر، حکومت کی جنگ لڑ رہا ہو اور اسے کوئی امداد نہ ملے تو دلاور خان نے کہا کہ ’میں میڈیا پر آن دی ریکارڈ اتنا بڑا جھوٹ کیسے بول سکتا ہوں۔‘

انہوں نے کہا کہ لشکر بناتے وقت حکومت نے باقاعدہ وعدہ کیا تھا کہ تمام رضاکاروں کو ہتھیار، راشن، تیل اور یہاں تک کہ نوکریاں بھی دی جائی گی لیکن کسی بھی وعدے کو وفا نہیں کیا گیا۔

خیال رہے کہ پاکستان میں دو ہزار آٹھ میں حکومت نے دہشت گردی کے خلاف جاری جنگ میں شدت پسندوں کو عام افراد سے لاتعلق کرنے کےلیے قبائلی لشکر بنانے کی حکمت عملی کا آغاز کیا تھا۔ تاہم اکثر علاقوں میں یہ حکمت عملی کامیاب ہوتی نظر نہیں آرہی بلکہ عسکریت پسندوں کی طرف سے لشکروں پر حملوں سے سینکڑوں افراد مارے جاچکے ہیں جس سے اب لوگ واضح طورپر طالبان کے سامنے آنے سے گریزاں ہیں۔بعض تجزیہ نگاروں کا خیال ہے کہ اگلے وقتوں میں یہ لشکر خود بھی حکومت کے لیے کئی قسم کے مسائل پیدا کرسکتے ہیں۔

http://www.bbc.co.uk/urdu/pakistan/2010/12/101209_lashkar_threats_rza.shtml