”پاڑھ“ پہ کھڑی جمہوریت

سویرے سویرے…نذیر ناجی

وزیراعظم یوسف رضا گیلانی آخر کار وہ زبان بولنے پر مجبور ہو گئے‘ جو ان کے خاندان کا شیوہ نہیں۔ مجھے نہیں یاد کہ شہد کی طرح میٹھے اور چونسے کی طرح خوشبودار‘ سید حامد رضا گیلانی اور ان کے بھائیوں نے‘ سیاست میں کبھی شائستگی کا دامن ہاتھ سے چھوڑا ہو۔

دوسری طرف میاں نوازشریف بھی اس طرح کی خاندانی روایت رکھتے ہیں۔ ان کے بزرگ ہرچند سیاست میں نہیں تھے لیکن خوش کلامی انہیں بھی مرغوب تھی۔ نوازشریف اسی روایت کے پاسبان ہیں۔ خیال تھا کہ ایک طرف وزیراعظم کی روایتی شخصیت اور دوسری طرف نوازشریف کا مہذب لہجہ دونوں بڑی جماعتوں میں ایک نئے سیاسی کلچر کی بنیاد ڈالے گا اور ایک دوسرے کے خلاف نامناسب الزام تراشی اور تلخ کلامی سے کام نہیں لیا جائے گا۔ نوازشریف اور بے نظیر دونوں کی طرف سے اے-آر-ڈی کے مشترکہ اعلامیے میں اس طرز کلام پر شرمندگی کا اظہار کیا گیا تھا‘ جو 90ء کے عشرے کے دوران دیکھنے میں آیا۔

مگر گزشتہ روز وزیراعظم کے ہاتھ سے صبر کا دامن چھوٹ گیا اور انہوں نے قومی اسمبلی کے ایوان میں کھڑے ہو کر ایسے لہجے اور الفاظ میں اظہار خیال کیا‘ جس کا اس ایوان میں کبھی مشاہدہ نہیں کیا گیا تھا۔ میں صرف یوسف رضا گیلانی کی بات کر رہا ہوں کہ وہ بطور رکن اسمبلی‘ بطور وزیر‘ بطور سپیکر اور اب بطور وزیراعظم‘ اس ایوان میں کافی سینئر ہیں۔ انہوں نے ہر حیثیت میں قومی اسمبلی کے اندر مہذب الفاظ اور طریقے سے بات کی۔کبھی ان کے لہجے میں تلخی نظر نہیں آئی۔

کل منگل 2 نومبر کو ان کی تقریر میں‘ سب کچھ تھا۔ غصہ بھی۔ جھلاہٹ بھی۔ ترش الفاظ بھی اور دھمکی بھی۔ انہوں نے صاف بتا دیا کہ کوئی غلط فہمی میں نہ رہے۔ میں اسمبلی نہیں توڑوں گا۔ مارشل لا نہیں لگے گا۔ مڈٹرم الیکشن کی باتیں کرنے والے پہلے بلدیاتی انتخابات کروا کر دیکھ لیں‘ انہیں اپنی مقبولیت کا اندازہ ہو جائے گا اور یہ کہ مڈٹرم الیکشن کا مطالبہ‘ ملک توڑنے کی سازش ہے۔ میری یادداشت کے مطابق وزیراعظم بننے کے بعد‘ یوسف رضا گیلانی نے کبھی ایسے الفاظ اور لہجے سے کام نہیں لیا۔ یوں لگتا ہے کہ وہ غالب کے اس شعر کی تمثیل بنے ہوئے تھے۔

پاتے نہیں ہیں راہ تو چڑھ جاتے ہیں نالے
رکتی ہے میری طبع تو ہوتی ہے رواں اور

کل رکی ہوئی طبع رواں نظر آئی اور کئی مہینوں سے جو نالے چڑھ کر جمع ہوتے رہے تھے‘ انہیں راہ مل گئی اور وہ سب کچھ ایوان کے اندر کہہ گئے‘ جس سے گریز کرتے رہے۔ وزیراعظم نے جو بات واضح کرنے کی کوشش کی ہے‘ اسے رموز سیاست کو سمجھنے والے سب لوگ جانتے ہیں۔

موجودہ جمہوریت کسی باقاعدہ سیاسی عمل‘ تحریک یا جدوجہد کے نتیجے میں بحال نہیں ہوئی۔ اسے نئے سرے سے‘ نئی بنیادوں پر کھڑا کرنے کی کوشش ہو رہی ہے۔ ابھی اس کی عمارت نے بنیادوں کو مضبوطی سے نہیں پکڑا۔اس کے نیچے اور چوطرفہ ”گو“ (Scaffolding)لگی ہوئی ہے۔ یہ کسی دھچکے‘ دھکے یا لرزش کو نہیں سہہ سکتی۔ لیکن ہمارے سیاستدانوں کو اس کی پروا نہیں۔ وہ اپنی مقابلہ بازی میں سب کچھ بھول جاتے ہیں۔ موجودہ جمہوریت کی زیرتعمیر عمارت‘ ہمیں وہ جگہ بھی مہیا نہیں کرتی‘ جس میں سیاسی رسہ کشی کا شوق پورا کیا جا سکے۔ کسی کی بدمستی ‘ بے احتیاطی‘ یا لغزش سے Scaffolding کے سہارے کا‘ کوئی بھی حصہ اپنی جگہ سے ہل گیا‘ تو یہ عمارت دھڑام سے نیچے گر سکتی ہے۔ جمہوریت کی تعمیر کا ذمہ کسی کا بھی ہو‘ مگر سب کا مفاد اسی سے وابستہ ہے۔ اگر اس کا ڈھانچہ گرا‘ تو حفاظت پر مامور سیاستدان یعنی معماری کے ذمہ دار ہی متاثر نہیں ہوں گے‘ سب کا کچومر نکلے گا۔ حیرت کی بات یہ ہے کہ چار مرتبہ ہم نے جمہوریت سے کھلواڑ کر کے ‘ تعمیر کے آخری مرحلوں پر پہنچی ہوئی عمارت کو‘ باہمی خرمستیوں اور بدمستیوں سے گرایا ہے اور پھر کم و بیش ایک ایک عشرہ اس کے ملبے تلے دبے رہ کر گزارا ہے۔ صرف یحییٰ خان کا عشرہ پورا نہیں ہوا کیونکہ اس بدبخت نے دو ڈھائی سال کے اندر ہی ملک دو لخت کر دیا تھا۔ ایک بار پھر زیرتعمیرعمارت Scaffolding کے سہارے کھڑی ہے۔ اس کے اینٹ‘ روڑے‘ گارا‘ سریا‘ ریت اور سیمنٹ باہمی گرفت کو ناقابل شکست بنانے کے لئے‘ بہت وقت لیں گے۔

ہوس اقتدار کے بعض بھوکے سیاستدان اور ان سے فوائد حاصل کرنے کے امیدوار(یعنی آکاس یا امر بیلیں)‘ صبر اور انتظار کی اہلیت کو سمجھنے سے انکاری ہیں۔ انہیں اندازہ ہی نہیں کہ صدر زرداری اور وفاق کی مخلوط حکومت کے تمام حصے دار اور پارلیمانی ٹیم کے قائد یوسف رضا گیلانی‘ روز گرنے کے خطرے سے دوچار ہوتی ہوئی حکومت کو سنبھال کر‘ سب کی خدمت کر رہے ہیں۔ جمہوریت کی عمارت Scaffolding کے سہارے کھڑی رہ کر جو مضبوطی حاصل کرے گی‘ وہ سب کے مفاد میں ہے۔یہی وجہ ہے کہ جب کوئی اس عمارت کو ہلانے یا گرانے کی کوشش کرتا ہے‘ تو سمجھدار سٹیک ہولڈرز پریشان ہو جاتے ہیں۔ یوسف رضا گیلانی نے کل جس اضطراب کا اظہار کیا‘ اس میں فوج کے جذبات کی بھی آئینہ دار ی تھی۔

بدلے ہوئے حالات میں‘فوجی قیادت بھی اس حقیقت کو جان چکی ہے کہ اگر Scaffoldingپر کھڑی جمہوریت کی عمارت کو نقصان پہنچایا گیا‘ تو یہ خود فوج کے لئے بھی اچھا نہیں ہو گا۔ وزیراعظم اپنے منصب کی نسبت سے جن معلومات اور سوچوں تک رسائی رکھتے ہیں‘ وہ ہر کسی کو حاصل نہیں۔ وہ ایک ذہین آدمی ہیں اور یقینی طور پر سمجھ چکے ہوں گے کہ اس وقت فوج کے ذہن میں کیا ہے؟

اگر فوج ابھی تک ”ایمبولینس گروپ“ کی دہائیوں پر کان نہیں دھر رہی اور اپوزیشن کی طرف سے ”تبدیلی“ کے لگاتار اشاروں کو خاطر میں نہیں لا رہی‘ تو اس کی یقینا کوئی وجہ ہے۔ ورنہ اقتدار کس کو برا لگتا ہے؟ خدا کا شکر کرنا چاہیے کہ موجودہ فوجی قیادت میں کوئی یحییٰ خان‘ ضیاالحق یا پرویزمشرف موجود نہیں‘ جو اقتدار کی بھوک میں اندھا دھند جمہوری نظام کو ٹینکوں تلے روند کر ایوان اقتدار پر قبضہ کر بیٹھے۔ ایک نے ملک توڑا۔ دوسرے نے معاشرے کو تباہ و برباد کر کے‘ اس کی بنیادیں ہلا دیں اور تیسرے نے غیروں کی جنگ کو اپنے ملک میں داخل کر کے نئے نئے محاذ کھول دیئے۔ ماضی کے سارے آمر اتنا کچھ بگاڑ کر چلے گئے ہیں کہ اب بگاڑنے کیلئے کچھ باقی ہی نہیں۔ اب یا ہم سابقہ آمروں کے چھوڑے ہوئے کھنڈرات پر نئی تعمیرات کر سکتے ہیں یا ملیامیٹ ہو سکتے ہیں۔ یہ بھی یاد رکھنا چاہیے کہ فوج اس ملک کی سب سے بڑی سٹیک ہولڈر ہے۔ وہ اپنا سب کچھ قربان کر دے گی‘ مگر ایسا کوئی اقدام نہیں کرے گی‘ جس کے نتیجے میں ملک مزید تباہی کے راستے پر چل نکلے۔

اس لئے وزیراعظم کی باتوں کو محض سیاسی بیان نہیں سمجھنا چاہیے۔ انہوں نے مذکورہ تقریر اپنے مزاج کے خلاف کی ہے۔ جو کچھ انہوں نے کہا ہے‘ اس کا مطلب بالکل وہی ہے‘ جو ان کے الفاظ اور لہجے میں دکھائی دیا۔ اس تقریر کے بعد چوہدری نثار کا یہ کہناباعث حیرت ہے کہ”اسمبلی توڑنے کے علاوہ بھی تبدیلی کا آئینی طریقہ ہے۔“ ان کے رتبے کے سیاستدان کو یہ زیب نہیں دیتا۔ وہ انتہائی باخبر سیاستدان ہیں۔ انہیں یہ بتانے کی ضرورت نہیں کہ آئینی طریقے صرف دو ہیں۔ یا وزیراعظم اسمبلیاں برخواست کر کے وسط مدتی انتخابات کا اعلان کر دیں یا اپوزیشن تحریک عدم اعتماد کو کامیاب کر کے‘ اپنے وزیراعظم سے یہ کام کرا دے۔ آئینی تبدیلی کا ہر راستہ ایوان کے اندر سے نکلتا ہے۔ ان سے یہ پوچھنا چاہیے کہ مزید آئینی راستے کیا ہیں؟ مناسب یہ ہے کہ وہ ان راستوں کی فہرست جاری کر دیں۔ ورنہ جو کچھ وزیراعظم نے کہا ہے اسے سچائی سمجھ کر مان لیں۔ مان لینے میں بہتری ہے۔ انکار میں نہیں۔

http://search.jang.com.pk/details.asp?nid=480866