تبدیلی کی تیاریاں..سویرے سویرے…نذیر ناجی

یہ بے معنی باتیں ہیں کہ مسلم لیگ (ق) کے لیڈروں نے پیپلزپارٹی کے لئے کیا کہا تھا؟ اور پیپلزپارٹی نے مسلم لیگ (ن) کے لئے کیا کہا؟ سیاست میں وقت ہمیشہ آگے بڑھتا ہے۔ جو ماضی سے لپٹ کر بیٹھ گیا‘ وہ خود ماضی بن گیا۔ جماعت اسلامی نے قیام پاکستان کی مخالفت کی تھی۔ آج وہ نظریہ پاکستان کی سب سے بڑی محافظ بنی ہوئی ہے۔ خود قائد اعظم ہندو مسلم اتحاد کے سفیر تھے۔ وہ دو قومی نظریے کے سب سے بڑے راہنما بن کر سامنے آئے اور پاکستان حاصل کیا۔

ذوالفقار علی بھٹو اور نوازشریف دونوں ہی فوجی حکمرانوں کی قائم کردہ مسلم لیگوں میں شامل تھے۔ بعد میں دونوں ہی آمریت دشمن کی حیثیت سے ابھرے۔ پڑوسی ملک بھارت میں‘ ہم روز ہی ماضی کے مخالفین کو گلے ملتے اور حامیوں کو دست و گریباں ہوتے ہوئے دیکھتے ہیں۔ پاکستان میں چونکہ جمہوریت کا تسلسل قائم نہیں رہا اور آزادانہ سیاسی عمل آگے نہیں بڑھ سکا‘ اس لئے ہمیں سیاست میں وقت کے ساتھ رونما ہونے والی تبدیلیوں کا تجربہ نہیں اور جب ایسا کوئی واقعہ ہوتا ہے‘ تو ہم ہڑبڑا اٹھتے ہیں اور پرانی باتیں دہرا کر طعنہ زنی کرنے لگتے ہیں۔

حال میں وزیرقانون و پارلیمانی امور ڈاکٹر بابر اعوان اور چوہدری پرویز الٰہی کی ملاقات پر بھی اسی قسم کا ردعمل سامنے آ رہا ہے۔ کسی نے یہ نہیں سوچا کہ باہمی الزام تراشیوں کی زد میں آنے والوں کو اس کی جو تکلیف ہوتی ہے‘ کسی دوسرے کو نہیں ہو سکتی۔ اگر وہ خود بھول رہے ہیں‘ تو وہ لوگ جن کی حیثیت تماشائی سے زیادہ کچھ نہیں‘ ان کے سینوں میں زخم ابھی تک کیوں ہرے ہیں؟ کیا اس وقت انہیں یہ زخم لگے بھی تھے‘ جب وہ الزام تراشیاں ہو رہی تھیں‘ جنہیں اب دہرایا جا رہا ہے؟

وقت کے ساتھ سیاسی اقدامات اور تدبیرسازی ہوتی رہتی ہے۔نوازشریف نے برملا کہا تھا کہ وہ مشرف کے کسی ساتھی کو قریب نہیں پھٹکنے دیں گے۔ آج (ق) لیگ کے 40 سے زیادہ اراکین صوبائی اسمبلی مسلم لیگ (ن) کی آغوش میں بیٹھے ہیں اور کئی مرکزی لیڈر ہم خیالی کا لبادہ اوڑھ کرمذاکرات کرتے رہتے ہیں۔ حال میں جن لوگوں نے مسلم لیگوں کے اتحاد کا منصوبہ تیار کیا‘ وہ درحقیقت مسلم لیگ (ن) کو اسٹیبلشمنٹ کے پسندیدہ سیاسی عناصر کے ساتھ ملانا چاہتے ہیں۔ جی ایچ کیو کے معروف سیاستدان‘ پیرصاحب پگاڑا کی اپنی سیاسی حیثیت ساڑھے چار نشستوں کی ہے۔ ان کی قیادت میں مسلم لیگوں کو جمع کرنے کا واضح مقصد یہ ہے کہ ایک کنگز پارٹی پھر سے کھڑی کی جائے‘ جس پر اسٹیبلشمنٹ کو اعتبار ہو اور پیپلزپارٹی کے مخالف تمام سیاسی عناصر کو یکجا کر کے انتخابی میدان میں اترنے کی تیاریاں کی جائیں اور نئی کنگز پارٹی انتخابات میں کامیابی حاصل کرے۔

فرق یہ ہے کہ ماضی کی کنگز پارٹیاں تخت نشینی کے بعد بنائی گئیں اور موجودہ کنگز پارٹی‘ کنگ کے بغیر بنانے کی کوشش ہو رہی ہے۔ اس لئے اس کے بننے میں کافی مشکل ہو گی۔ کنگز پارٹیوں میں شامل ہونے والے پہلے کنگ کو دیکھتے ہیں اور پھر فیصلہ کرتے ہیں۔ یہی وجہ ہے کہ نئی کنگز پارٹی کا سلسلہ آگے نہیں بڑھ رہا۔ مسلم لیگ (ق) اس کنگز پارٹی کے امکانات کو جانچ رہی تھی۔ اس نے اب بھی دروازے بند نہیں کئے۔ وہ ”تیل دیکھو اور تیل کی دھار دیکھو“کے فارمولے پر چل رہی ہے۔ مگر بقول چوہدری پرویزالٰہی‘ دروازے کھلے رکھے ہوئے ہیں۔ کھلے دروازوں کی سیاست میں رونما ہونے والی تبدیلیوں کے ساتھ ہم آہنگ ہونے اور انہیں جذب کرنے میں آسانی رہتی ہے اور کوئی بھی سیاسی جماعت‘ ممکنات کے دروازے اپنے اوپر بند کرنا درست نہیں سمجھتی۔ ممکنات کو حقائق میں بدلنے کا نام ہی سیاست ہے۔

پیپلزپارٹی اور مسلم لیگ (ق) میں یہ پہلا کھلا رابطہ‘ ہنگامہ خیز اس لئے ہوا کہ بہت سے روایت پسند اور پیپلزپارٹی کے دشمن عناصر‘ اس کے لئے تیار نہیں تھے اور کئی ایک کو تو گہرا صدمہ ہوا۔ لیکن وقت اپنے آگے بڑھتے ہوئے قدموں کو اس لئے نہیں روک سکتا کہ چند لوگ تبدیلی کا عمل برداشت کرنے کی صلاحیت سے محروم ہیں۔ وقت کے قدم آگے بڑھتے رہتے ہیں اور گذشتہ روز چوہدری پرویزالٰہی اور بابر اعوان کی ملاقات کی صورت میں‘ ایک انتہائی اہم قدم آگے بڑھ گیا۔ ضروری نہیں کہ دونوں جماعتوں میں‘ ادغام‘ اتحادیا انتخابی گٹھ جوڑ ہو۔ یہ بعد کی چیزیں ہیں۔ ابھی موجودہ اسمبلیوں کو مزید اڑھائی سال رہنا ہے۔

پنجاب اور وفاق کی حکومتیں ایک دوسرے سے آسودہ نہیں اور سیاست کے مزاج میں تلون ہے۔ وہ نئے راستے اور نئے امکانات ڈھونڈتی اور پیدا کرتی رہتی ہیں۔ اسلام آباد اور لاہور میں‘ ان دونوں جماعتوں کا میل ملاپ نئے سیاسی حقائق کو جنم دے سکتا ہے۔ مسلم لیگوں کے اتحاد کا فارمولا اسی وجہ سے تیار کیا گیا کہ وفاق میں پیپلزپارٹی کی جگہ ایک نئی کولیشن کا راستہ ہموار کیا جائے۔ پیپلزپارٹی مفاہمت کی سیاست کی وجہ سے کسی قبل ازوقت تبدیلی کے لئے تیار نہیں تھی۔ لیکن نئے سیاسی اتحاد کی طرف سے‘ جب پیپلزپارٹی کو اپنے لئے خطرہ نظر آیا‘ تو اسے بھی متحرک ہونا پڑا۔

یہ خطرہ اس وقت واضح ہو گیا‘ جب چوہدری نثار علی خان اور جناب نوازشریف نے اسمبلیوں کے اندر تبدیلی کی حمایت کر دی‘ اس کے بعد پیپلزپارٹی میدان سے باہر کیسے رہ سکتی ہے؟ اس کیلئے یہ سوچنا لازم ہو گیا تھا کہ اگر تبدیلی ہونا ہے‘ تو پھر وہ اس کے اپنے حق میں کیوں نہ ہو؟ ایک طرف پتے لگائے جا رہے تھے‘ تو دوسری طرف والے ہاتھ پر ہاتھ دھرے کیوں بیٹھے رہتے؟

پتوں کے کھیل میں مسلم لیگ (ق) کے پاس ترپ کا پتہ ہے۔ اس کی مشکل صرف ایک ہے کہ اس کے اراکین اسمبلی کسی ڈسپلن میں نہیں۔ ان کے کئی ممبر بازار کے مال کی طرح ہیں‘ جو کسی بھی گاہک کو دستیاب رہتے ہیں۔ ان کا زیادہ مول اس لئے نہیں پڑتا کہ فروختگی کے بعد ان کا ووٹ خریدار کے کام نہیں آ سکتا۔ ووٹ دیتے ہی اس کی رکنیت ختم ہو جائے گی۔ اس مجبوری کے نتیجے میں پارٹیوں کے رہنماؤں کی طاقت فیصلہ کن ہے۔ لوٹے ہمیشہ اقتدار سے فائدے اٹھانے والے افراد بنتے ہیں۔ ابھی تک مسلم لیگ (ق) پنجاب میں‘ اس لئے بے بس رہی کہ اس کے اراکین کی بڑی تعداد باغی ہو کر لوٹا بن گئی۔ یہ لوٹے حکومت کی حمایت تو کرتے ہیں‘ مگر ووٹ صرف ایک بار دے سکتے ہیں۔ کیونکہ جیسے ہی انہوں نے پارٹی کے ایک فیصلے کے خلاف ووٹ دیا‘ چوہدری شجاعت حسین کا ایک خط انہیں ممبری سے محروم کر دے گا۔ جبکہ پیپلزپارٹی باضابطہ کولیشن پارٹنر ہونے کی وجہ سے پنجاب کی موجودہ حکومت کو برقرار رکھے ہوئے ہے۔ یوں لگتا ہے کہ دونوں طرف کے ضامنوں کی وجہ سے ایک دوسرے کی حکومت کو سہارا دینے کے جو وعدے ہوئے تھے‘ انہیں برقرار رکھنے کے ارادوں میں کمزوری آنے لگی ہے۔ دونوں فریق جانچ پرکھ کر رہے ہیں کہ وعدہ توڑنے کی صورت میں کیا فائدہ ہو گا؟ اور ضامنوں کی طرف سے اس کا ردعمل کیا ہو گا؟ اگر ضامنوں نے وعدہ شکنی کو نظرانداز کرنے کا فیصلہ کر لیا‘ تو یہ دونوں جماعتیں وعدے توڑنے میں تاخیر نہیں کریں گی۔ ایوانوں کے اندر تبدیلی لانے کا جو اعلان نوازشریف اور چوہدری نثار علی خان نے کیا ہے‘ اس پر وعدہ شکنی کے بعد ہی عمل ہو سکتا ہے۔

مسلم لیگ (ق) اور پیپلزپارٹی کا پہلا کھلا سیاسی رابطہ ‘اسی صورتحال کی تیاری کے لئے ہے‘ جو پیپلزپارٹی کے لئے پیدا کی جا رہی ہے۔ تبدیلی کا یہ کھیل شروع ہوا‘ تو چوہدری شجاعت حسین سب سے طاقتور کھلاڑی کی صورت میں سامنے آئیں گے۔ وفاقی حکومت میں ان کی جماعت پیپلزپارٹی کو کئی غیرمطمئن اتحادیوں سے بے نیاز کر سکتی ہے اور تخت لاہور پر براجمانی کا مسئلہ بھی پیدا کر سکتی ہے۔جیسے ہی اسٹیبلشمنٹ کے تیور بدلے‘ سب لوٹے اور متذبذب اراکین اسمبلی‘ لپک کر پارٹی کے ڈسپلن میں آ جائیں گے۔ پھر سیاسی نقشہ بدلنے میں کتنا وقت لگے گا؟

http://search.jang.com.pk/details.asp?nid=478762

Hasan Nisar:

سمجھ نہیں آتی کہ پیپلزپارٹی اور ق لیگ کے مکالمہ میں ایسی کون سی قیامت پوشیدہ ہے کہ اتنا شور مچایا گیا۔ وہ کون تھا جو آج پیپلزپارٹی کی گود میں بیٹھا ہے اور کل ن لیگ کی طرف سے بی بی مرحومہ اور بیگم نصرت بھٹو کی کردارکشی کے لئے غلیظ ترین مہم چلا رہا تھا اور ان کے لئے وہ زبان استعمال کر رہا تھا جس کا کوئی خاندانی آدمی تصور بھی نہیں کرسکتا۔ ابھی کل کی بات ہے جب میاں نواز شریف کہتے تھے کہ پیپلزپارٹی کا نام سنتے ہی ان کا خون کھولنے لگتا ہے اور ان کا بس چلے تو پی پی پی کو بحیرہ ٴ عرب میں غرق کردیں۔ محترمہ بینظیرحقارت سے جواباً میاں صاحب کو ”نوازو“ کہا کرتی تھیں۔ جنرل ضیاء الحق کی قبر پر کھڑے ہو کر اس مشن کی تکمیل کا عہد کرنے والے وہی میاں نواز شریف آج فوجی مداخلت کا ذکر سننا بھی پسند نہیں کرتے اور اسی ”سکیورٹی رسک“ کے ساتھ سائن کئے گئے ”میثاق جمہوریت“ کے بغیر ان کی کوئی گفتگو مکمل نہیں ہوتی تو بھائی! ہم جیسے ملکوں میں، ”جمہوریت پذیر“ ملکوں میں میچورٹی اسی طرح سلوموشن میں آتی ہے اسی لئے دھیرج حضور! دھیرج… صرف ق لیگ اور پیپلزپارٹی ہی کیا، میں تو بہت پہلے لکھ چکا کہ اس ملک کی تمام تر سیاسی و دیگر قوتیں سرجوڑ کر بیٹھیں، اصل مسائل کی نشاندہی کریں اور پھر ان کے مختلف حل تجویز کرکے کوئی مشترکہ لائحہ عمل طے کرکے تندہی سے اس پر عمل کریں ورنہ سب کچھ ہاتھ سے نکل جائے گا اورہاتھ ملتے رہ جائیں گے۔ بعد ازاں اسی بات کو میاں نواز شریف نے اک اورطرح بیان کیا کہ آئندہ 25سال کے لئے کچھ نکات پر متحد ومتفق ہونے میں ہی بہتری ہے۔
لوٹ کے مال پر قتل و غارت اور سیاست میں بہت فرق ہے، سیاسی اختلاف کو قبائلی دشمنی کا روپ دینا خودکشی کے سوا کچھ نہیں بالخصوص ہم جیسے حالات میں جہاں ملک اور معاشرہ اک ایسے وحشی اونٹ کی شکل اختیار کرچکا جس کی کوئی ایک آدھ کل بھی سیدھی نہیں رہ گئی۔ بنی نوع انسان کی تاریخ میں بدترین معاشرے بھی دکھائی دیتے ہیں لیکن ان میں بھی چند مثبت باتیں مل جاتی ہیں مثلاً اسلام کی آمد سے قبل عربوں کے ایام جاہلیت لیکن ان میں بھی چند خوبیاں تھیں مثلاً شجاعت، زبان اورپناہ دے کر نہ پھرنا، مہمان نوازی وغیرہ لیکن آج اپنے اردگرد دیکھتا ہوں تو کانپ اٹھتا ہوں کہ سیاست و معیشت توالگ… یہاں توہر اچھی روایت بھی قتل عام کی بھینٹ چڑھ چکی تو ایسے میں جتنے سر بھی جڑ سکیں… بہتر ہوگا۔

http://search.jang.com.pk/details.asp?nid=479039