منو بھائی کی پیشین گوئی اور عاصمہ جہانگیر…قلم کمان …حامد میر

شیطان نے اللہ تعالیٰ سے اختلاف کیا لیکن اللہ تعالیٰ نے شیطان کو ختم کرنے کی بجائے اسے برداشت کیا۔ افسوس کہ ہم انسان ایک دوسرے کے ساتھ اختلاف کو برداشت کرنے کی صلاحیت سے محروم ہوتے جا رہے ہیں اور معمولی اختلاف پر ایک دوسرے کو ختم کرنے کے درپے ہو جاتے ہیں۔ ہم اپنی رائے اور اپنے نظریئے سے اختلاف کو انا کا مسئلہ بناتے ہیں اور پھر یہ انا کا مسئلہ یا تو وطن سے دوستی اور دشمنی کی جنگ بن جاتا ہے یا پھر کفر و اسلام کی جنگ بن جاتا ہے۔

ہم اپنے مخالفین و ناقدین کو دلیل اور محبت سے قائل کرنے کی بجائے انہیں بھارت کا ایجنٹ، یہودیوں کا تنخواہ دار یا کافر ثابت کرنے پر تل جاتے ہیں۔ ہم یہ نہیں سوچتے کہ سچائی اختلاف کرنے والوں پر غصے میں نہیں آتی کیونکہ سچائی تو ایک ایسا سورج ہوتا ہے جسے اندھیروں سے کوئی گھبراہٹ نہیں ہوتی۔ سچا انسان ہمیشہ اعلیٰ ظرف ہوتا ہے اور جھوٹا انسان کم ظرف ہوتا ہے۔ اعلیٰ ظرف اختلاف کو برداشت کرتا ہے اور کم ظرف اختلاف پر غصے میں آ جاتا ہے۔

سیاست میں ایک دوسرے کے ساتھ اختلاف رائے ایک دوسرے کے سیاسی وجود کا ثبوت ہے اور جو لوگ اختلاف کے ساتھ جینا نہیں سیکھ سکتے وہ مہذب کہلانے کے لائق نہیں لیکن سچ تو یہ ہے کہ ہمارے معاشرے کے پڑھے لکھے اور مہذب طبقے میں بھی برداشت کم ہوتی جا رہی ہے۔

وکلاء کو معاشرے کا پڑھا لکھا طبقہ سمجھا جاتا ہے لیکن سپریم کورٹ بار ایسوسی ایشن کے حالیہ الیکشن میں جس قسم کی الزام بازیاں سننے میں آئیں وہ ناقابل یقین تھیں۔ اس الیکشن میں وکلاء کے تین گروپ آمنے سامنے تھے اور تینوں نے پچھلے تین سال میں معذول ججوں کی بحالی کی تحریک میں اہم کردار ادا کیا لیکن ایک گروپ کی امیدوار عاصمہ جہانگیر کے خلاف گھٹیا اور گھناؤنے الزامات کی بھرمار کر دی گئی۔

سب سے پہلے انہیں کافر قرار دیا گیا اور الزام لگایا گیا کہ وہ قادیانی ہیں میں نے الزام لگانے والے ایک صاحب سے پوچھا کہ مولانا صلاح الدین کی نواسی قادیانی کیسے ہو سکتی ہے؟ جواب ملا کہ ان کے شوہر قادیانی ہیں۔ میں نے عاصمہ جہانگیر سے پوچھا تو انہوں نے کہا کہ ان کے شوہر قادیانی نہیں ہیں البتہ ان کے سسرال میں کچھ لوگوں کا تعلق احمدیوں کی لاہوری جماعت سے رہا ہے۔ یاد رہے کہ علامہ اقبال کے خاندان میں بھی کچھ قادیانی موجود تھے لیکن اس وجہ سے علامہ اقبال کو قادیانی نہیں کہا جا سکتا۔ عاصمہ جہانگیر کے حامیوں کا کہنا تھا کہ انہوں نے سپریم کورٹ بار سے فتوے نہیں لینے بلکہ وکلاء کے حقوق کا تحفظ حاصل کرنا ہے لہٰذا ان کے نزدیک صدارتی امیدوار کے مذہبی عقائد کی کوئی اہمیت نہیں۔

جب ”کفر“ کا الزام کارگر ثابت نہ ہوا تو کہا گیا کہ عاصمہ جہانگیر آزاد عدلیہ کی مخالف ہیں اور پیپلز پارٹی کے ساتھ مل کر چیف جسٹس افتخار محمد چوہدری کے خلاف سازش کر رہی ہیں۔ اس الزام کی وجہ شاید یہ تھی کہ پیپلز پارٹی کے کچھ حامی وکلاء ان کی حمایت کر رہے تھے حالانکہ پیپلز پارٹی کی رکن قومی اسمبلی جسٹس (ر) فخرالنساء کھوکھر ان کی مخالفت بھی کر رہی تھیں۔

سپریم کورٹ بار کے الیکشن میں عاصمہ جہانگیر کی کامیابی پر ہمارے بزرگ اور استاد جناب منو بھائی نے بڑا معنی خیز تبصرہ کیا ہے۔ منو بھائی لکھتے ہیں کہ ”پورے یقین سے کہہ سکتا ہوں کہ عاصمہ جہانگیر کی کامیابی کی خوشیاں منانے والے اپنا یہ جشن زیادہ دیر تک جاری نہ رکھ سکیں گے وہ حکومت سے لے کر اپوزیشن تک کسی بھی سیاسی دھڑے کا ساتھ نہیں دیں گی جو کوئی بھی اپنی حدود سے تجاوز کرے گا عاصمہ جہانگیر کی شدید تنقید کی زد میں آئیگا“۔

منو بھائی کے یقین وجہ یہ ہے کہ جب جنرل پرویز مشرف نے نواب اکبر بگٹی کو غدار قرار دے کر انہیں مارنے کی کوشش شروع کی تو عاصمہ جہانگیر نے بگٹی صاحب کو بچانے کی کوشش کی۔ جب اسلام آباد کی لال مسجد میں فوجی آپریشن شروع ہوا تو عاصمہ جہانگیر نے امریکا کی ناراضگی کو خاطر میں نہ لاتے ہوئے اس آپریشن کی کھل کر مخالفت کی۔

جو خاتون ایک فوجی ڈکٹیٹر اور امریکا کی ناراضگی سے نہیں ڈرتی وہ پیپلز پارٹی کی ناراضگی کو بھی خاطر میں نہیں لائیگی۔ منو بھائی کی پیشنگوئی پوری ہو رہی ہے۔ پاکستان بار کونسل کی طرف سے جوڈیشل کمیشن میں ڈاکٹر خالد رانجھا کی نامزدگی پر عاصمہ جہانگیر کے حامیوں کا اختلاف سامنے آ چکا ہے۔ مسلم لیگ (ق) کے سینیٹر ڈاکٹر خالد رانجھا کا نام بار کونسل کی طرف سے پیپلز پارٹی کے سینیٹر کاظم خان نے تجویز کیا۔ واضح رہے کہ بارکونسل کے ایک اجلاس میں علی احمد کرد نے جسٹس (ر) فخرالدین جی ابراہیم کا نام تجویز کیا تھا لیکن کاظم خان نے بارکونسل میں اپنے گروپ کی اکثریت کے بل بوتے پر فخرالدین جی ابراہیم کی بجائے ڈاکٹر خالد رانجھا کو ترجیح دی۔ کاظم خان نے یہ فیصلہ لطیف کھوسہ صاحب کی مشاورت سے کیا۔ علی احمد کرد اور فخرالدین جی ابراہیم نے سپریم کورٹ بار ایسوسی ایشن کے الیکشن میں عاصمہ جہانگیر کی حمایت کی تھی لیکن پیپلز پارٹی کے وکلاء نے ان کی نہیں مانی۔

آنے والے دنوں میں آپ دیکھیں گے کہ عاصمہ جہانگیر بھی پیپلز پارٹی کے وکلاء سے ڈکٹیشن نہیں لیں گی اور جن عناصر نے محض سیاسی اختلاف کی بناء پر عاصمہ جہانگیرکو آزاد عدلیہ کا دشمن ثابت کرنے کی کوشش وہ آپ کو ”کافر“ اور ”غدار“ عاصمہ جہانگیر کے حق میں نعرے لگاتے ہوئے دکھائی دیں گے۔

میرے کچھ دوستوں کا خیال ہے کہ میں عاصمہ جہانگیر کے بارے میں ضرورت سے زیادہ خوش فہمی کا شکار ہوں۔ اس خوش فہمی کے جرم میں ایک ویب سائٹ پر مجھے اور میرے مرحوم والد کو بھی قادیانی قرار دیا جا چکا ہے کیونکہ میں نے 17جون 2010ء کو عاصمہ جہانگیر کے حق میں کالم لکھا تھا۔ میں اپنی خوش فہمی پر بدستور قائم ہوں۔ اس خوش فہمی کی وجہ منو بھائی کی پیشین گوئی کے علاوہ میرا اپنا یقین بھی ہے۔ میں جانتا ہوں کہ محترمہ بینظیر بھٹو نے اپنے پہلے دور حکومت میں عاصمہ جہانگیر کو جج بنانے کی کوشش کی لیکن ناکام رہیں۔ دوسرے دور حکومت میں وزیر بنانے کی کوشش کی لیکن ناکام رہیں۔ جس خاتون کو محترمہ بے نظیر بھٹو نہ جیت سکیں اسے جناب آصف علی زرداری کیسے جیت جائیں گے؟ جب بھی جمہوریت اور آمریت میں لڑائی ہوگی تو عاصمہ جہانگیر جمہوریت کے ساتھ کھڑی ہوں گی۔ لیکن جب جمہوریت کے نام پر آمریت قائم کرنے کی کوشش ہوگی تو عاصمہ اس جمہوری آمریت کو للکارنے والوں میں سب سے آگے ہوں گی۔

شاید آپ بھول گئے کہ وہ ملک غلام جیلانی کی بیٹی ہیں۔ وہی ملک صاحب جنہیں ذوالفقار علی بھٹو کے حکم پر مارشل لاء ضابطے کے تحت گرفتار کیا گیا تو عاصمہ عدالت میں چلی گئیں اور یہ مقدمہ عاصمہ جیلانی کیس کے نام سے مشہور ہوا۔ اس مقدمے کی تفصیل پڑھئے اور عاصمہ جہانگیر کو برداشت کیجئے

http://search.jang.com.pk/details.asp?nid=479872