ہزارہ ڈویژن میں احتجاج جاری

رفعت اللہ اورکزئی
بی بی سی اردو ڈاٹ کام، ایبٹ آباد

صوبہ سرحد کے ہزارہ ڈویژن کے دو اضلاع ہری پور اور ایبٹ آباد میں گزشتہ دو دنوں سے سڑکوں اور شاہراہوں پر مظاہرین کا راج ہے اور ہر طرف توڑ پھوڑ اور گھیراؤ جلاؤ کے مناظر دکھائی دیتے ہیں۔بظاہر ایسا لگتا ہے کہ جیسے پورا علاقہ عوام کے حوالے کیا گیا ہو۔

ہری پور سے لے کر ایبٹ آباد تک ہر کلومیٹر دو کلومیٹر کے فاصلے پر مظاہرین چھوٹی چھوٹی ٹولیوں اور گروپوں کی شکل میں سڑکوں اور شاہراہوں پر ڈنڈوں اور پھتروں سے مسلح نظر آتے ہیں۔ انہوں نے بڑے بڑے پھتر اور درختوں کے تنے رکھ کر تمام سڑکیں بند کی ہوئی ہیں۔ کئی مقامات پر مظاہرین بازاروں کے بیچ میں ٹائر جلا کر احتجاج کر رہے ہیں۔

گزشتہ دو دنوں سے ہری پور اور ایبٹ آباد میں پبلک ٹرانسپورٹ کی آمد ورفت مکمل طورپر معطل ہے جبکہ تمام بازار، تعلیمی ادارے، سرکاری دفاتر اور بنک بھی بند ہیں۔ اگر کوئی گاڑی ادھر ادھر کچے راستے پر جاتی ہوئی نظر آتی ہے تو مظاہرین اس پر بھی پھتراؤ کرکے اس روکنے کی کوشش کرتے ہیں۔

کئی مقامات پر رات کے وقت بھی مظاہرین سڑکوں کے قریب اندھیرے میں چھپے ہوئے نظر آئے اور اس دوران جونہی کوئی گاڑی وہاں سے گزری تو اس پر پتھراؤ کیا جاتا رہا۔

تحریک صوبہ ہزارہ ایکشن کمیٹی کے سربراہ بابا حیدر زمان کی طرف سے تین دن کےلیے احتحاج مؤخر کرنے کے اعلان کے باوجود ہری پور اور ایبٹ آباد میں رات گئے تک احتجاج کا سلسلہ جاری رہا۔ بظاہر ایسا لگ رہا تھا کہ اس اعلان سے حالات معمول پر آنے شروع ہوجائیں گے لیکن رات گئے تک ایسے کوئی اثرات دکھائی نہیں دیئے
۔
ہری پور سے ایبٹ آباد تک ہر طرف مظاہرین انتہائی مشتعل اور غصے میں نظر آئے ۔ ان سے بات کی تو ہر ایک ہی بات بار بار داہراتے رہے ’ صوبہ ہزارہ صوبہ ہزارہ‘۔

http://www.bbc.co.uk/urdu/pakistan/2010/04/100413_haripur_abbotabad.shtml

’ہزارہ صوبہ بن جائے، کوئی اعتراض نہیں‘

ذوالفقار علی
بی بی سی اردو ڈاٹ کام، اسلام آباد
صوبہ سرحد کی حکمران جماعت عوامی نیشنل پارٹی کے رہنما نے کہا کہ انہیں ہزارہ ڈویژن کو الگ صوبہ بنانے پر کوئی اعتراض نہیں ہے لیکن اس کے لیے قومی اسمبلی سے بل منظور کرانا پڑے گا۔

ہزارپ ڈویژن میں ہونے والے مظاہروں میں پانچ افراد ہلاک ہو چکے ہیں

عوامی نیشنل پارٹی کے ایڈیشنل سیکریڑی جنرل ہاشم بابر نے یہ بیان ایک ایسے مرحلے پر دیا ہے جب ہزارہ ڈویژن میں صوبہ سرحد کا نام پختونخواہ رکھنے کے خلاف پرتشدد احتجاج کیا جا رہا اور مسلم لیگ (ق) اس احتجاج میں آگے آگے ہیں۔

ساتھ ہی انہوں نے ہزارہ ڈویژن میں صوبہ سرحد کا نام خیبر پختونخواہ رکھنے کے خلاف موجودہ بے چینی کو مسلم لیگ (ق) اور مسلم لیگ (ن) کے درمیان سیاسی کشمکش قرار دیا لیکن مسلم لیگ (ق) کے رہنما اس کو مسترد کرتے ہیں۔

واضح رہے کہ گذشتہ جمعرات کو قومی اسمبلی میں اٹھارویں ترمیم منظور کی گئی جس میں اور شقوں کے علاوہ صوبہ سرحد کا نام خیبر پختونخواہ رکھنے کی تجویز کی منظوری دی گئی۔

صوبہ سرحد کا نام خیبر پختونخواہ رکھنے کی تجویز کے حق میں دو سو چونسٹھ اراکین نے ووٹ دیا تھا جب کہ مسلم لیگ (ق) کے صرف بیس اراکین نے مخالفت میں ووٹ ڈالا۔

صوبہ سرحد کا نام تبدیل کرنے کی شق پر ووٹنگ کے دوران ہزارہ سے تعلق رکھنے والے مسلم لیگ (ن) کے دو اراکین سردار مہتاب عباسی اور میاں نواز شریف کے داماد کیپٹن ریٹائرڈ صفدر نے ووٹنگ میں حصہ نہیں لیا۔

قومی اسمبلی سے منظوری کے بعد یہ بل سینٹ یا ایوان بالا کو بھیج دیا گیا جہاں اس پر بحث ہو رہی ہے۔

صوبہ سرحد کی حکمران جماعت عوامی نیشنل پارٹی کے ایڈیشنل سیکریڑی جنرل ہاشم بابر نے بی بی سی اردو ڈاٹ کام سے گفتگو کرتے ہوئے کہا کہ ’اگر ہزارہ ڈویژن یہ چاہتا ہے کہ وہ الگ صوبہ بن جائے تو وہ قومی اسمبلی میں بل پیش کریں اور دوتہائی اکثریت حاصل کرکے الگ صوبہ بن جائے۔‘

ان کا کہنا ہے کہ ’یہ کوئی غداری نہیں ہے، نہ ہی اس میں کوئی برائی ہے، صوبے بنتے اور ٹوٹتے ہیں، زیادہ بھی ہوتے ہیں اور کم بھی ہوتے ہیں‘۔

انہوں نے صوبہ سرحد کا نام خیبر پختونخواہ رکھنے کے خلاف ہزارہ ڈویژن میں احتجاج کو مسلم لیگ ق اور مسلم لیگ ن کے درمیان سیاسی کشمکش کا نتیجہ قرار دیا۔

ان کا کہنا ہے کہ مسلم لیگ (ق) ہزارہ ڈویژن میں سیاسی فائدہ اٹھانا چاہتی ہے جس کی وجہ سے وہ احتجاج کر رہے ہیں۔

ہاشم بابر نے کہا کہ مسلم لیگ (ن) نے پختونخواہ رکھنے کی حمایت کی بلکہ اس کے ساتھ خیبر کا اضافہ مسلم لیگ (ن) نے ہی کیا اور مسلم لیگ (ق) یہ سمجھتی ہے کہ اگر وہ مخالفت کریں گے تو ہزارہ میں کچھ ایسے لوگ ہوں گے جو ان کے ساتھ شامل ہوجائیں گے۔

عوامی نیشنل پارٹی کے رہنما نے کہا کہ ’میں ان سے پوچھتا ہوں کہ آخر ان کو خیبر پختونخواہ کے نام سے کیوں چڑ ہے جبکہ خیر بھی اسی علاقے کا حصہ ہے اور پختوانخواہ میں چھہتر فیصد پختون آباد ہیں‘۔

http://www.bbc.co.uk/urdu/pakistan/2010/04/100412_hazara_name_as.shtml

اپنا حق مانگنا چاہئیے لیکن دوسرے کی حق تلفی کی قیمت پر نہیں۔ اپنی زبان اور کلچر پر فخر کرنا چاہئے لیکن دوسرے کی توہین سے گریز کرنا ہوگا۔ بعض نعرے بڑے سہانے اور بظاہر بڑے منطقی نظر آتے ہیں لیکن اس کے اندر تباہی کے پیغام چھپے رہتے ہیں۔ یہ تعلیم ‘ ٹیکنالوجی اور اقتصاد کا دور ہے ‘ جو بھی اپنے لوگوں کو تشدد اور جذبات کے راستے پر گامزن کرتا ہے ‘ نعرہ اس کا کتنا مقدس کیوں نہ ہو‘ وہ اپنے لوگوں کے دشمن کا کردار ادا کررہا ہوتا ہے ۔ یہ بات بھی پیش نظررہیں کہ پختون بلٹ میں عسکریت پسندی کا سلسلہ حسب سابق زوروں پر ہے۔ ہزارہ ڈویژن بھی عسکریت پسندوں کا گڑھ ہے ۔ سیاسی قیادت کی آپس کی لڑائی جاری رہی اورحکومتی رٹ کمزور ہوئیتو وہ دن دور نہیں کہ وہ آکریہاں سے اسفندیارولی خان کی بھی چھٹی کرادیں‘ سردار مہتاب کی بھی اور گوہر ایوب خان کی بھی۔ یاد رکھئے وہ لوگ پختون اور غیرپختون کا تمیز نہیں کرتے۔ جو بھی انکی سوچ اور اپروچ سے اتفاق نہیں کرتا ‘ قابل گردن زدنی قرار پاتا ہے اور ہاں یاد رکھئے کہ امریکی ڈرون اور بی باون سے پھینکے جانے والا میزائل اور بم بھی پختون اور غیرپختون کی تفریق نہیں کرتا ۔ وہ بلاتفریق رنگ و نسل ‘ ہر اس بندے کو نشانہ بناتا ہے جو امریکہ کا حقیقی مخالف ہو

http://search.jang.com.pk/details.asp?nid=425168

۔سرائیکی صوبے کی بات تو سمجھ میں آتی ہے کہ جنوبی پنجاب کو ایک انتظامی یونٹ کی ضرورت ہے ۔لاہور وہاں سے بہت دور ہے، اس لئے اس کے بہت سے مسئلے حل نہیں ہو ر ہے ہیں۔ لیکن بہاولپور کو صوبہ بنا نے کی منطق سمجھ میں نہیں آتی ۔ اگر بہاولپور ایک ریاست تھی تو خیر پور، قلات اور سوات بھی ریاست تھی ۔ اصل بات یہ ہے کہ یہ اتنے پیچیدہ معاملات ہیں کہ انہیں سڑکوں پر حل نہیں کیا جا سکتا۔ اور اب ہزارہ کے بارے میں جو کہا جا رہا ہے کہ اٹھارویں ترمیم کے بعد انیسویں ترمیم کے ذریعے یہ مسئلہ حل کیا جائے تو اس سے یہ مسئلہ اور بھی الجھ جا ئے گا۔خاص طور سے اس وقت جب آگ لگی ہوئی ہے ۔ سیدھی سی بات یہ ہے کہ یک کمیشن بنایا جائے جو آئینی اور انتظامی امور سامنے ر کھتے ہوئے تمام صوبوں کی نئی تشکیل پر غور کرے ۔ وہ ہندوستان کا تجربہ سامنے رکھے اور یہ دیکھے کہ یہ صوبے زبان کی بنیاد پر بنائے جائیں یا انتظامی بنیاد پر ۔ لیکن اس سے پہلے ہزارہ میں بھڑکنے والی آگ پر قابو پانے کے لئے کمیشن تو بنائیے ۔ وہاں کے لئے فورا کمیشن بنانے کی ضرورت ہے ۔ یہ غیر جانب دار کمیشن تحقیق کرے کہ وہاں آگ کیوں لگی اور کس نے لگائی ۔ اس کے بعد مسئلے کا حل تلاش کیا جائے ۔

http://search.jang.com.pk/details.asp?nid=425173